धरानः धरानमा आगलागी भएको छ । विद्युत सर्ट भएर आगलागी हुँदा धरानस्थित महेन्द्र बहुमुखी क्याम्पसको सटर कोठामा आगलागी भएको हो ।
भाडामा लगाउँदै आएको एक सटर कोठामा आगलागी भएको इलाका प्रहरी कार्यालय धरानका डिएसपी ज्ञानेन्द्र बस्नेतले जानकारी दिए । अक्वा सोलुसन इन्टरप्राइजेज नामक पसलमा आगलागी भएको हो । दिउँसो करिब ३ः२५ बजेतिर आगलागी भएको थियो ।
१५ वटा फिल्टर, कोठामा भएको फर्निचर जलेर नष्ट भएको सञ्चालक राजु राईले जानकारी दिए । आगलागीबाट अन्दाजी साढे सात लाख रुपैयाँ क्षति पुगेको अनुमान गरिएको उनले जानकारी दिए । ‘अहिलेसम्मको मोटामोटी क्षति भएको अनुमान लगाउँदा करिब साढे ७ लाख रुपैयाँजति क्षति भएको अनुमान गरेका छौं ।’ उनले भने ।
प्रहरी र धरान उपमहानगरपालिकाको दमकलको सहायताले आगो नियन्त्रणमा लिइएको थियो । ‘आगो निभिइसकेको छ’, डिएसपी बस्नेतले भने, ‘विद्युत सर्ट भएर आगलागी भएको हुनसक्ने अनुमान छ ।’ दिनभर पसलमै बसेको र पसल बन्द गरेर गएपछि आगलागी भएको सञ्चालकको भनाइ छ ।

तस्वीरः लक्ष्मण थापा