धरानः धरानमा डेरा लिएर गाँजा कारोबार गर्ने युवालाई प्रहरीले पक्राउ गरेको छ ।
भोजपुरको हतुवागढी गाउँपालिका–६ घर भई धरान उपमहानगरपालिका–१३ डेरा गरी बस्ने ३४ वर्षीय गुमान राई सवा २ केजी गाँजासहित पक्राउ परेका छन् ।
राईले आफ्नै घर कोठामा गाँजा भण्डारण गरी बेचबिखन गर्ने गरेको भन्ने विशेष सूचनाको आधारमा इलाका प्रहरी कार्यालय धरानबाट खटिएको प्रहरी टोलीले राईलाई २ केजी २७० ग्राम गाँजासहित पक्राउ गरेको हो । लागूऔषधसहित पक्राउ परेका उनीहरुको सम्बन्धमा प्रहरीले थप अनुसन्धान भइरहेको प्रहरीले जनाएको छ ।
उता झापाको दुई छुट्टाछुट्टै स्थानबाट ब्राउनसुगरसहित दुईजना पक्राउ परेका छन् । विशेष सूचनाको आधारमा इलाका प्रहरी कार्यालय काकडभिट्टाबाट खटिएको प्रहरी टोलीले मेचीनगर नगरपालिका–७ गैह्रीगाउँबाट मेचीनगर नगरपालिका–६ का २४ वर्षीय सुरज खड्कालाई २ ग्राम लागूऔषध ब्राउनसुगरसहित पक्राउ गरेको हो । यसैगरी सोही कार्यालयबाट खटिएको प्रहरी टोलीले मेचीनगर नगरपालिका–६ बाट स्थानीय २८ वर्षीय प्रकाश लिम्बूलाई १८ ग्राम लागूऔषध ब्राउनसुगरसहित पक्राउ गरेको ईलाका प्रहरी कार्यालय काकडभिट्टाले जनाएको छ । पक्राउ परेका दुवै जनाको सम्बन्धमा प्रहरीले थप अनुसन्धान गरिरहेको छ ।
यस्तै, उदयपुरमा नियन्त्रित लागूऔषध ट्याब्लेट र ठूलो परिणामको गाँजासहित ९ जना पक्राउ परेका छन् । जिल्ला प्रहरी कार्यालय उदयपुरबाट खटिएको प्रहरी टोलीले सोमबार बेलुका ५ बजेको समयमा त्रियुगा नगरपालिका–६ जलजलेबाट त्रियुगा नगरपालिका–१ का ३२ वर्षीय विदुर अधिकारी, त्रियुगा नगरपालिका–१४ का २६ वर्षीय कुमार मगर, त्रियुगा नगरपालिका–१३ का २५ वर्षीय सागर चौधरी र सुनसरीका २५ वर्षीय अभिसेक जैसवाललाई लागूऔषध ट्याब्लेटसहित पक्राउ गरेको हो ।
निजहरुको साथबाट प्रहरीले डाइजेपाम १९ एम्पुल, फेनारागन १९ एम्पुल, लुपिजेसिक १९ एम्पुल र २ वटा सिरिन्ज बरामद गरेको छ । यसैगरी उदयपुरकै त्रियुगा नगरपालिका–१२ बाट स्थानीय १५ बर्षीय बालक लागूऔषधसहित पक्राउ परेका छन् । निजको साथबाट प्रहरीले फेनारगन २ एम्पुल, नोरफिन २ एम्पुल र डाईजेल्याप २ एम्पुल बरामद गरेको छ ।
घटना सम्बन्धमा प्रहरीले थप अनुसन्धान गरिरहेको छ । यस्तै उदयपुरकै कटारी नगरपालिका–८ बाट ठूलो परिणामको गाँजासहित तिन जना पक्राउ परेका छन् । इलाका प्रहरी कार्यालय कटारीबाट खटिएको प्रहरी टोलीले बेतनीबाट कटारी तर्फ आउँदै गरेको स१च ८०४ नम्बरको पिकअपलाई रोकेर चेकजाँच गर्ने क्रममा सो पिकअपबाट १२१ केजी गाँजा बरामद भएको थियो । गाँजा बरामद भएसंगै गाडीमा सवार रहेका ताप्ली गाँपालिका–३ का ४१ वर्षीय सन्तबहादुर मगर, चालक २१ वर्षीय हेम बहादुर मगर र शम्भु मगर समेत गरी तीन जनालाई नियनत्रणमा लिई थप अनुसन्धान भइरहेको १ नम्बर प्रदेश प्रहरी कार्यालय विराटनगरका सूचना समन्वय अधिकृत प्रहरी नायव उपरीक्षक बिपिन रेग्मीले जानकारी दिए ।