धरानः धरानमा गोधुली रनिङ फुटबल प्रतियोगिता शुरु भएको छ ।
२१ औं संस्करण पुगिसकेको धरानको चर्चित अन्तर वडास्तरीय फुटबल प्रतियोगिताको उद्घाटन वडा नं १७ का वडाअध्यक्ष सूर्यकुमार भट्टराई (मनोज) ले गरेका छन् । कार्यक्रममा विशेष अतिथि एवं एन्फा १ नम्बर प्रदेश अध्यक्ष किशोर राई रहेका थिए ।
धरान–१६ स्थित रंगशालामा भएको खेलमा वडा नं ७ र वडा नं १६ बीच प्रतिस्पर्धा भएको थियो । प्रतियोगितामा वडा नं. १६ ले विजयी सुरुवात गरेको छ ।
साविकको उपविजेता १६ नं. वडाले ७ नं. वडालाई ५–१ को फराकिलो गोल अन्तरले पराजित गरेको हो । पहिलो हाफमा १६ नं. वडा १–० ले पछि परेको थियो । वडा नं. ७ का लागि विनेश तुलाधरले गोल गरेका थिए । १६ नं. वडाका लागि मन्दिप बस्नेतले ह्याट्रिक गरेका थिए । १६ नं. वडाका सविन राई र लोकेन लिम्बूले एक–एक गोल गरे । ७ नं. वडाका गोल किपरले प्रहार गरेको बल १६ नं. वडाका लोकेन लिम्बूलाई लागेर फर्कदा गोल भएको थियो ।
खेलको म्यानअफ द म्याच समेत घोषित भएका थिए । १६ नं. वडाले अब ६ नं. वडासँग खेल खेल्नेछ । भोलिको खेल वडा नं. ३ र वडा नं. ८ का बीच हुने आयोजकले जानकारी दिएको छ ।
प्रतियोगिताको विजेताले रनिङ ट्रफीसँगै नगद १ लाख ११ हजार १ सय ११ रुपैयाँ पाउनेछ भने उपविजेताले ५५ हजार ५ सय ५५ रुपैयाँ पाउने आयोजकले जनाएको छ ।
तस्वीरहरुः लक्ष्मण थापा