धरानः धरानमा मासु बजार डटकम सञ्चालनमा आएको छ । स्वदेशमै बसेर केही गर्न सकिन्छ भन्ने उद्देश्यले धरान १७ स्थित रेल्वेमा एक युवाले मासु बजार डटकम सञ्चालनमा ल्याएका हुन् ।
धरानका मेयर तिलक राईले मासु बजार डटकमको शुभारम्भ गरेका छन् । सञ्चालक अरुण राईले मासु बजार डटकम ४ लाख रुपैयाँको लगानीमा सञ्चालनमा ल्याएको जानकारी दिए । सञ्चालक राईका अनुसार अहिले खसी, कुखुरा र अण्डा पाईन्छ भने फ्रि होम डेलिभरीको पनि व्यवस्था छ । सफा र ताजा मासु सुलभ मूल्यमा बिक्री गरिने उनले बताए । मासु बजार डटकम सञ्चालनमा आएलगत्तै केही युवाहरुले रोजगार पनि पाएका छन् । आगामी दिनमा राँगा र लोकल कुखुराको मासु पनि थप्ने उहाँले जानकारी दिए ।
मेयर राईले धरान–१७ दिनदिनै बजारीकरण हुँदै गएको बताउँदै यहाँका स्थानीयबासी, टोलबासीहरु, वडाबासीहरु बजार खोज्नका लागि अन्यत्र जान जरुरी नभएको बताए । ‘यहाँ हरेक चिजको उपलब्धता छ, सब्जी, हार्डवेयर, किराना समान, फलफूल, मासु, खाद्यान्न, चियानास्ता सबै कुरा छ,’ उनले भने । मानिसहरुको स्वास्थ्यलाई मध्यनजर गर्दै ताजा, सफा र सुरक्षित मासु बिक्री-वितरण गर्न मेयर राईले आग्रह गरे ।
बजारको अवस्था, जनताको अवस्थालाई बुझेर व्यापार गर्न खोजिरहेको बताउँदै मेयर राईले सञ्चालक लगायत टिमलाई शुभकामना दिँदै व्यापार–व्यवसाय गर्दा कानुनी प्रक्रिया पुरयाएर गर्न पनि आग्रह गरे ।