धरानः लकडाउनको कारण रोकिएको प्रदेश १ स्तरीय बराह गु्रप बास्केटबल प्रतियोगिता चैत्र २ गतेदेखि सम्पन्न हुने भएको छ ।
धरान बास्केटवल संघको आयोजना तथा धरान उपमहानगरपालिका र सुनसरी बास्केटवल संघको सहयोगमा आयोजना हुन लागेको प्रतियोगिताको विषयमा आयोजकले शनिबार बराह किचनमा पत्रकार सम्मेलनको आयोजना गरि जानकारी गराएको छ ।
गत वर्ष चैत्र ७ देखि १२ गतेसम्म प्रतियोगिता आयोजना गर्ने सम्पूर्ण तयारी भइसकेपनि अन्तिम चरणमा कोरोना कहरले प्रतियोगिता रोकिएको जिल्ला बास्केटवल संघ, सुनसरीका अध्यक्ष नारायण सुवेदीले जानकारी दिए ।
धरान–१२ स्थित हिमालयन मेघा कलेजको बास्केटबल कोर्टमा आयोजना हुने प्रतियोगितामा छात्रतर्फ १३ र छात्रातर्फ ६ टिमले सहभागिता जनाउने भएका छन् । बिजेता टिमले नगद १५ हजार, उपविजेताले नगद ७ हजार ५ सय, ट्रफी, मेडल र प्रमाणपत्र प्राप्त गर्नेछ । यस्तै, छात्रातर्फका बिजेताले नगद १० हजार र उपविजेताले नगद ५ हजार, ट्रफी, प्रमाणपत्र र मेडल प्राप्त गर्नेछ ।
प्रतियोगीताका उत्कृष्ट खेलाडीले नगद २ हजार, हाइस्कोररले नगद १ हजार रुपैयाँ र राइजिङ प्लेयरले ट्रफी र प्रमाणपत्र प्राप्त गर्ने धरान बास्केटवल संघका अध्यक्ष एवं बास्केटबल संघका केन्द्रीय उपाध्यक्ष सुरजकुमार लामाले जानकारी दिए ।
व्याचलर लेवलका २३ वर्षमुनिका खेलाडीहरुले सहभागिता हुन पाउने प्रतियोगितामा धरान, विराटनगर, बिर्तामोड र इटहरीका कलेजका टिमले सहभागिता जनाएको छ । सहभागी कलेजहरुमा छात्रतर्फ डिपोट, महेन्द्र कलेज, धरान मेघा कलेज, केन्द्रीय प्रविधि क्याम्पस हात्तिसार, सियोन स्कुल, सिटी कलेज, एम्स, सगरमाथा, विकेभिएम विराटनगर, धरान आदर्श र विष्णु मेमोरियल रहेका छन् ।
त्यस्तै, महिला टिमहरुमा डिपोट, धरान आदर्श, विष्णु, हात्तिसार, सियोन र विराट नर्सिङहोम रहेको छ । प्रदेश १ मा कलेजस्तरमा पहिलोपटक हुन लागेको प्रतियोगीताको मुख्य प्रायोजकको रुपमा बराह गु्रप रहेको छ ।
प्रतियोगिताको समापनको दिन फाइनल खेलअघि प्रकाश पौडेल थ्री पोइन्ट कम्पिटिसन समेत हुनेछ । नेपालको चर्चित गायक तथा पूर्व बास्केटबल खेलाडीसमेत रहेका प्रकाश पौडेलको सहयोगमा थ्री पोइन्ट सुट कम्पिटिसन हुन लागेको सुनसरी अध्यक्ष सुवेदीले जानकारी दिए । १ मिनटको समयमा जसले बढी थ्री पोइन्ट एरियाबाट बास्केट गर्छ उही नै विजयी हुनेछ । विजेताले जनही नगद ३ हजार रुपैयाँ, ट्रफी र मेडल प्राप्त गर्नेछ ।
यसैगरी समापनको दिन नै बास्केटबल खेलको विकासमा योगदान पुरयाउने धरान–१८ रत्न चौक निवासी स्व. कुलबहादुर सेनिहाङ लिम्बूलाई सम्मान समेत गरिने भएको छ । उनलाई मरणोपरान्त सम्मान गर्न लागिएको हो ।
तस्वीरः सञ्जय याक्खा