धरानः धरानमा व्यवसायिक कफी खेतीसम्बन्धी प्रशिक्षण सम्पन्न भएको छ । तालिमपश्चात् ६०० कफीका विरुवा वितरण गरिएको थियो ।
तालिम धरान कफी तथा कृषि उत्थान केन्द्र धरान–१५ को आयोजना र १२ नंं वडा कार्यालयको सहयोगमा सम्पन्न भएको थियो । तालिमका सहजकर्ता कम्पनीका निर्देशक अञ्जना राईले कफी खेती फूलबारीमा सौन्दर्यता, हरियाली वातावरणको दृष्टिकोणले र ठूलो जग्गामा व्यवसायिक हिसाबले गर्न सकिने बताइन् ।
धरानलाई हरियाली र सुन्दर नगरी बनाउन एक घर कम्तीमा दुई कफी फूलबारी अनि करेसा बारीमा लगाउन सकिने केन्द्रका प्रमुख सल्लाहकार सभासद् किरणकुमार राईले बताए ।
उनले वडाको वजेटबाट विभिन्न लक्षित कार्यक्रम गरिरहेको र त्यसको उपलब्धी चाहे जति नदेखिएको अवस्थामा यो नयाँ र आम्दानी समेत दिने कार्यक्रम भएकोले उपलब्धिमूलक हुन सक्ने विचार व्यक्त गरे । वडाका विभिन्न टोल विकास संस्थाका अध्यक्ष, संघ संस्था र वडावासीहरुको सहभागिता रहेको थियो ।