धरानः अब धराने महिला थाकलको ब्याग बनाउन सक्ने भएका छन् ।
धरानस्थित सुनसरी उद्योग वाणिज्य संघको माथिल्लो तलमा उनीहरुले यस्तो सीप सिकेका हुन् । धरान–१५ की सिर्जना नेपालले घरमै बसेर पनि कमाउन सकिने आशाले तालिम लिएको सुनाइन् । ‘खासमा भन्ने हो भने यस्तो तालिम लिँदा महिलाले सीप सिक्ने हुन्, सीप सिकेपछि एकदिन न एकदिन त काम लाग्छ नि,’ उनले भनिन्, ‘त्यही भएर घरमै बसेर पनि कमाउन सकिन्छ भनेर लागिपरेको हुँ ।’
सुनसरीका महिला धरानमा यसरी सीप सिक्न तम्सिएका हुन् । धरान, इनरुवालगायतका महिला सीप सिक्न व्यस्त रहेका हुन् ।
सीप सिकिरहेकी इनरुवा–६ की देवीमाया पुरीले जंगलको झारले ब्याग बुनेर आत्मनिर्भर हुन पाउँदा खुशी लागेको बताइन् । उनले सीप सिकिसकेपछि इनरुवामा पुगेर महिलालाई तालिम दिएर आत्मनिर्भर बनाउने अठोट लिएको बताइन् । ‘पहिला शुरुमा त बिनाबित्थामा तालिम लिएको भन्ने लागेको थियो तर सीप सिक्दै गएपछि अहिले आएर इनरुवा पुगेर अन्य महिलालाई पनि आत्मनिर्भर बनाउन सक्छु भन्ने आँट पलाएको छ ।’ उनले भनिन् ।
धरानकी लक्ष्मी सुवेदीले काम सजिलो कुनै पनि नहुने बताउँदै मिहिनेत गरेमा सफलता मिल्ने हुनाले मिहिनेतकै काम रोजेको बताइन् । ‘झन्झट नमानी मिहिनेतका साथ यस्तो सीप सिक्ने हो भने धेरै महिला आत्मनिर्भर बन्न सक्छन्’, लक्ष्मीले सुझाइन् । उनले आर्थिक स्थिति सुधार्नको लागि यस्तो सीप सहयोगी हुने बताइन् ।
नेपाल उद्यमशील महिला संघ, सुनसरी शाखाले धरानमा यस्तो तालिम सिकाएको अध्यक्ष यशोदा कायस्थले जानकारी दिइन् । उनले यसअघि चुरा बनाउने सीप सिकाएको र अहिले महिलालाई आत्मनिर्भर बनाउन ब्याग बनाउने तालिम दिइएको जानकारी दिइन् ।
थाकल ब्याग बनाउने सीप सिक्न सुनसरीभरीका १५ जना महिलाले सहभागिता जनाएका छन् । तालिम लिइसकेपछि आफ्नै घरमा बसेर पनि महिलाको लागि आर्थिक उपार्जन हुने उनले बताइन् । ‘खासमा तालिममा सिकेका सीपलाई घरमै बसेर पनि प्रयोग गर्ने हो भने पनि महिला आत्मनिर्भर बन्न सक्छन्, यसका लागि थोरै लगानी, सीप र मिहिनेत भने अवश्य चाहिन्छ ।’
स्थानीय बेरोजगार, अर्धबेरोजगार युवती एवम् घरमै बस्ने गृहिणीहरूलाई यस प्रकारका क्रियाकलापमा संलग्न गराउन उत्प्रेरित गर्ने गरेको उनले बताइन् । सीप सिकाउनका लागि प्रशिक्षककारुपमा दाङकी चन्द्रावती चौधरी समेत आइपुगेकी छिन् ।
तस्वीरहरुः हाम्रो कोशी आवाज