विराटनगरः मोरङमा व्यापारीको गोदाममा छापा मार्दा हतियार बरामद भएको छ ।
विराटनगर महानगरपालिका–७ जलजला चोकस्थित राजकुमार रौनियारको आरएम ट्रेडर्सको गोदामबाट छापा मार्दा हतियार बरामद भएको हो । गोदामबाट १ थान कटुवा पेस्तोल र सो पेस्तोलमा लाग्ने २ थान गोली बरामद गरिएको प्रहरीले जनाएको छ । प्रहरीका अनुसार सोही ट्रेडर्समा काम गर्ने सोही महानगरपालिका–६ बस्ने सुनसरी इटहरी उपमहानगरपिका–१७ घर भएका २४ वर्षीय सुजित साहलाई आइतबार साँझ प्रहरीले पक्राउ गरेको छ ।
जिल्ला प्रहरी कार्यालय मोरङ र राजस्व अनुसन्धान कार्यालय इटहरीबाट खटिएको संयुक्त टोलीले जाँच गर्ने क्रममा उक्त हतियारसहित फेला पारी उनलाई पक्राउ गरेको हो ।
गोदाममा छापा मार्ने क्रममा कटुवा पेस्तोल र त्यसमा लाग्ने दुई राउण्ड गोली बरामद भएको जिल्ला प्रहरी कार्यालय मोरङका प्रहरी उपरीक्षक सन्तोष खड्काले बताए । रौनियारले आफूसँग कारोबार गर्ने व्यक्तिलाई तर्साउनका लागि पेस्तोल राखेको बताएका छन् । तर पेस्तोल भेटिएपछि सुजित कुमार साहले आफूले नै राखेको स्वीकार गरेका थिए ।