धरानः जिल्ला प्रशासन कार्यालय सुनसरीले मङ्गलबार मध्यरातिदेखि जिल्लाभर पूर्ण निषेधाज्ञा आदेश जारी गरेको छ ।
डिसिसिएमसि बैठकपछि प्रमुख जिल्ला अधिकारी उमेशकुमार ढकालले आज राति (बैशाख २१ गते) १२ बजेदेखि बैशाख ३१ गते मध्यराति १२ बजेसम्मको लागि बन्दाबन्दीको आदेश जारी गरेका हुन् ।
यो अवधिमा औषधी, खाद्यवस्तु तथा अत्यावश्यक वस्तु वा सेवा खरिदबाहेक कुनै पनि व्यक्ति घर बाहिर निस्कन रोक लगाइएको छ । अत्यावश्यक सेवाहरुबाहेकका सबै प्रकारका सार्वजनिक एवं निजी सवारीसाधनहरु पनि मङ्गलबार रातिदेखि बैशाख ३१ गते रातिसम्म जिल्लाभर पूर्णरुपमा रोक लगाइएको छ ।
‘आजबाट लागू हुनेगरी वैशाख ३१ गतेसम्म पूर्ण निषेधाज्ञा जारी भएको बताउँदै जोर–बिजोर प्रणालीसमेत हटाइएको छ’, प्रजिअ ढकालले भने, ‘अत्यावश्यकबाहेक हिँडडुलमा रोक लगाउँदै निषेधाज्ञा कडा बनाइएको छ ।’ कोरोना भाइरसको संक्रमण नियन्त्रण गर्नका लागि सुनसरीका १२ वटै स्थानीय निकायमा निषेधाज्ञा जारी गरिएको उनले बताए ।
सुनसरीका इनरुवा, दुहवी, धरान, इटहरी उपमहानगरपालिका, रामधुनी बराहक्षेत्र नगरपालिका तथा कोशी भोक्राहा नर्सिङ, हरिनगरा, बर्जु र गडी गाउँपालिकामा निषेधाज्ञा जारी गरिएको छ । यसअघि जिल्ला प्रशासन कार्यालय सुनसरीले २४ गतेसम्म मात्रै निषेधाज्ञा गर्ने निर्णय गरेको थियो ।