जीप खस्दा यो बाटो कालोपत्रे भइसकेको थिएन ।

धरानः पूर्वमा धेरैलाई थाहा छ, त्यो अक्करको डरलाग्दो भीर । थाहा नभए, नदेखेपनि सुनेकोचाहिँ पक्कै हुनुपर्छ । अक्करको भीरबाटै पनि धेरै भरिया खसेको स्थानीयबासी बताउँछन् । संखुवासभाको खराङ, तुम्लिङटार, खाँदबारी, चैनपुरसम्म हिले र धरानबाट ढाकरमा नुन, तेल, खाद्यान्न बोकिन्थ्यो । भनौं, त्यतिबेला धेरैलाई यो बाटो काट्न धौ धौ हुने गरेको थियो । तर अहिले ती र त्यस्ता कुरा किंवदन्तीमै सीमित भएको छ । अहिले त्यहाँ भीरको ढुङ्गा कोपेर गाडी गुड्ने राम्रो बाटो बनाइएको छ । अहिले निजी सवारीमा यात्रा गर्ने यात्रुले टिकटक बनाउन समेत थालेका छन् ।
यसअघि सो ठाउँले चर्चा कमाएकै थियो । २०७६ भदौ ३१ गते एउटा अकल्पनीय घटना घटेको थियो । धर्मदेवी नगरपालिका=८ मा पर्ने यो अक्करको भीरबाट अरुण नदीमा खसेर जीपका चालकसहित बेपत्ता ६ जना बेपत्ता भएका थिए । जीप खस्दा यो बाटो कालोपत्रे भइसकेको थिएन । बेपत्ताको शव अहिलेसम्म भेटिएको छैन । जीप दुर्घटनामा एकै परिवारका तीनजना बेपत्ता भएका थिए । को १ ज ३७४९ नम्बरको बोलेरो जीप त्यहाँबाट खसेको थियो ।
त्यतिबेला शव नभेटिएपछि कुशको शव बनाएर दाहसंस्कार गरिएको थियो । बेपत्ता भएका यात्रु फेला नपरेपछि आफन्तले कुशको शव बनाएर दाहसंस्कार गरेका थिए ।
बेपत्ता हुनेमा खाँदबारी नगरपालिका-९ ढुङगेधारा घर भएका २४ वर्षीय संगम श्रेष्ठ उनकी श्रीमती २३ वर्षीय सदीक्षा राई श्रेष्ठको दुई महिनाका छोरा समिर श्रेष्ठ, २४ वर्षीय प्रमेश थापामगर, २९ वर्षीय खबरमान पिठाकोटी र खाँदबारी-९ घर भएका जीपका चालक २५ वर्षीय सन्तोष विश्वकर्मा छन् ।
जिल्ला अस्पताल खाँदबारीले मृगौलाका बिरामी प्रमेश र दुई महिनाका बालक समिर श्रेष्ठलाई उपचार हुन नसक्ने जनाउँदै बीपी कोइराला स्वास्थ्य विज्ञान प्रतिष्ठानमा रिफर गरेको थियो । धरान हिँडेका उनीहरुको अक्करको भीरको बीच बाटोबाट राति साढे १० बजे खसेको थियो । जीप सडक भन्दा करिब ५० मिटर तल अरुणमा खसेर बेपत्ता भएको थियो । गोताखोर टोली बोलाउँदा समेत शव र बोलेरो भेटिएन । अहिले सो ठाउँमा मृतकको स्मृतिमा मन्दिर र धर्म फलैंचासमेत निर्माण गरिएको छ ।
धनकुटाको लेगुवा–तुम्लिङटारअन्तर्गत पर्ने सो सडक अहिले पिच भइसकेको छ । तर पनि अक्करको भीरमा पर्ने सडकमा भने साँघुरो नै छ । अझै भीर कोप्नुपर्ने देखिन्छ । यसतर्फ सम्बन्धित निकायले ध्यान दिनु आजको आवश्यकता हो ।
सडक कालोपत्रे नहुँदा सास्ती
हिले-तुम्लिङटारअन्तर्गत पर्ने यो सडक मध्यपहाडी लोकमार्गअन्तर्गत पर्छ ।
अहिले पनि सो सडकमा समस्या नै देखियो । ठाउँठाउँमा कालोपत्रे छ तर हिले-लेगुवा सडक कालोपत्रे हुन सकेको देखिएन । हिले-केवा खोला (लेगुवा केही पर) सडक म्याद गुज्रिँदा समेत कालोपत्र हुन सकेको देखिएन । समयमा कालोपत्रे नहुँदा हिउँदमा धुलाम्मे र वर्षातमा हिलाम्य हुने गरेको र सास्ती खेप्दै आएको स्थानीयबासी बताउँछन् ।

ठाउँठाउँ कालोपत्रे गरिएपनि अन्य ठाउँ जस्ताको त्यस्तै छ । कालोपत्रेका लागि ठेक्का लगाइएको समय पनि गुज्रिसकेको र पटक-पटक म्याद थपिँदा पनि कालोपत्रे हुन नसकेको स्थानीयबासीले बताएका छन् । ‘खासमा यो सडक समयमै सकिनुपर्ने हो तर अहिलेसम्म नसकिँदा यात्रु, स्थानीयबासीले सास्ती खेपिरहनुपरेको छ’, लेगुवाका स्थानीय भुवन बस्नेतले भने, ‘यस्तो पाराले त भएन नि ।’ सडकमा उड्ने धुलोले स्थानीय खान समेत राम्ररी नपाएको र रोगको शिकार बन्नुपर्ने बाध्यतामा गुज्रिरहेको उनी बताउँछन् ।
विरुवा कन्ट्रक्सनले तीन वर्षभित्र सक्ने भन्दै आएपनि अहिलेसम्म नसकिएको उनी बताउँछन् । ‘यो सडकका लागि पटक पटक, समय समयमा म्याद थपिएको थियो’, उनले भने, ‘तरपनि जस्ताको त्यस्तै छ ।’
२०७६ चैत मसान्तसम्म सक्ने भन्दै जिम्मा लिएपनि सम्झौताअनुसार काम सम्पन्न नभएपछि गत पुस १५ सम्म म्याद थपिएको थियो । थपिएको समय अवधिमा पनि सडक कालोपत्रे हुन सकेन । र पुनः म्याद थपिएको स्थानीयबासी बताउँछन् ।
करिब २९ करोड रुपैयाँको लगानीमा ठेक्का लिएको कन्ट्रक्सनले १३ किलोमिटर सडकका केही स्थानमा कालोपत्रे र अधिकांश ठाउँमा कवर्ट र नाली मात्रै बनाएको पाइएको छ । एक वर्षअघि नै कालोपत्रे गर्ने भनिएपनि हालसम्म नसकिएको स्थानीयबासी बताउँछन् ।
कालोपत्रे नहुँदा सवारी चल्न सहज नबनेको उनीहरु बताउँछन् । ‘वर्षामा हिलो गाडी फँस्दा यात्रु र सवारी चालक हैरान बनेका छन्’, स्थानीय, ‘छिटो कालोपत्रे गर्नुपर्ने देखिएको छ ।’ कन्ट्रक्सनले भने लकडाउनले काममा ढिलो हुँदै आएको बताउँछ । संखुवासभाबाट फर्केर । तस्वीरः हाम्रो कोशी आवाज

अक्करको भीर जीप खसेपछि खोज्दै गोताखोरको टोली । वर्षाको समयमा उर्लिएको अरुण ।

भीरबाट जीप खसेपछि हेर्दै स्थानीय र यात्रुहरु (माथि) र शव नभेटिएपछि कुशको शव बनाएर जलाउँदै स्थानीय ।