विराटनगरः आइतबार बिहान पानीसहित परेको चट्याङमा परी मोरङको छुट्टाछुट्टै स्थानमा एकजनाको मृत्यु भएको छ भने २ जना घाइते भएका छन् ।
बिहान पौने ९ बजे रङ्गेली नगरपालिका–१ हाटखोला का ३० वर्षीय प्रविन माझीको चट्याङमा परी मृत्यु भएको छ । उनी बारीमा काम गरिरहेको अवस्थामा चट्याङमा परी गम्भीर घाइते भएका उनको रंगेली अस्पतालमा पुरयाउन साथ मृत्यु भएको इलाका प्रहरी कार्यालय रङ्गेलीले जनाएको छ ।
त्यस्तै, बिहान साढे ९ बजे मोरङकै जहदा गाउँपालिका–६ पोखरियाका ४५ वर्षीय मुक्तर मियाँ अन्सारी र निजकै श्रीमती २६ वर्षीया जाननारा खातुनलाई आफ्नै घरमा बसिरहेको अवस्थामा चट्याङको झट्का लागेर घाइते भएका हुन् । उनीहरुको कोशी अस्पताल विराटनगरमा उपचार भइरहेको जिल्ला प्रहरी कार्यालय मोरङका प्रहरी उपरीक्षक महेन्द्रकुमार श्रेष्ठले जानकारी दिए ।