धरानः अमेरिकाको मेरील्याण्ड राज्यमा शनिबार बिहान गोली प्रहार हुँदा एक नेपालीको मृत्यु भएको छ । गोली प्रहारबाट संखुवासभाको खाँदबारी नगरपालिका-६, तल्लो पांठाका सागर घिमिरेको मृत्यु भएको अन्तर्राष्ट्रिय सञ्चार माध्यमहरुले उल्लेख गरेका छन् । गोलीप्रहारसँगै त्यहाँ आगजनीसमेत भएको छ ।

घिमिरेले विद्यार्थी हुन् । उनका काका कप्तान घिमिरेका अनुसार उनले केही समय अघिमात्र साउथ क्यारोलाइनास्थित क्लिफ्टन विश्वविद्यालयबाट कम्प्युटर साइन्समा स्नातक गरेका थिए । आगजनी तथा गोली प्रहारबाट घिमिरेसहित ४ जनाको मृत्यु भएको स्थानीय अधिकारीहरुले जनाएका छन् । घिमिरेले केही समय अघिमात्र साउथ क्यारोलाइनास्थित क्लाफ्लिन युनिभर्सिटीबाट कम्प्युटर साइन्समा स्नातक गरेको उनका सहोदर काका कप्तान घिमिरेले बताए । ५१ वर्षीय एक व्यक्तिले घरमा आगो लगाएपछि घरबाहिर सटगन लिएर बसेको र घटनास्थलमा प्रहरी आउनासाथ प्रहरीको गोलीबाट ती व्यक्तिको मृत्यु भएको बताइएको छ । घटनामा अर्का एक नेपाली युवा पनि घाइते भएको र उनको अवस्था खतरामुक्त रहेको बाल्टिमोर एशोसियसन अफ नेपलिज अमेरिकाका पूर्वमहासचिव तथा पत्रकार गौतम दाहालले बताए ।
सागर ४ वर्ष अगाडि उच्च शिक्षा अध्ययनका लागि अमेरिका आएका थिए । उनी विक्रम घिमिरे र दुर्गा घिमिरेका कान्छा छोरा हुन् । मृतक घिमिरेका एक दाजु र एक दिदी रहेका छन् । ‘राम्रो अंकका साथ ब्याचलर्स गरेको थियो,’ उनका काका कप्तानले भने, ‘पढाइमा तेज भएकोले उसले स्कलरसिप पनि पाएको थियो ।’ -एजेन्सी