धरानः धरान–१५ स्थित अस्थायी प्रहरी चौकीमै पुगेर हतियारधारी समूहले आक्रमण गरेको छ ।
बिहीबार साँझ खुकुरी र तरबारीसहित पुगेका केही समूहले आक्रमण गरेको हो । आक्रमणमा कार्यालयका प्रमुख असई सुमन दाहाल घाइते समेत भएका छन् । उनको धरानस्थित बीपी कोइराला स्वास्थ्य विज्ञान प्रतिष्ठानको आकस्मिक कक्षमा उपचार भइरहेको छ ।
इलाका प्रहरी कार्यालय धरानका प्रहरी निरीक्षक हेमराज ओलीले आफूहरु घटनास्थलमा रहेको र बुझ्ने काम भइरहेको जानकारी दिए । ‘अहिले हामी घटनास्थलमै बुझ्ने र आक्रमणकारीलाई पक्राउ गर्ने तयारीमा छौं, केहीक्षणपछि घटनाबारे विस्तृत जानकारी आइहाल्छ ।’
आधा दर्जन बढी युवाहरु पुगेर त्यहाँ आक्रमण गरेको प्रहरीले जनाएको छ । आक्रमणकारीले घाइते दाहाललाई खुकुरी प्रहार गरेका थिए । उनको हातमा चोट लागेको प्रहरीले जनाएको छ । ‘योजनाबद्ध ढङ्गले नै आक्रमण गरेको पाइएको छ’, प्रहरी निरीक्षक ओलीले भने ।