धरानः अन्ततः धरानमा बसपार्क बन्ने नै भएको छ । धरान ८ स्थित तीनकुने सुन्दरवस्ती विकास आयोजनाको मल्टिप्रपोज एरियामा स्मार्ट बसपार्क निर्माण हुने भएको हो । धरानमा स्मार्ट बसपार्क बनाउन ठेकेदार कम्पनीसँग सम्झौता भएको छ । सम्झौता भएसँगै १५ दिनभित्र निर्माण कार्य शुरु हुने जनाइएको छ ।
स्मार्ट बसपार्क बनाउन सम्झौतापत्रमा हस्ताक्षर भएको छ । बुधबार उपमहानगरपालिका र निर्माण व्यवसायी गीताञ्जली जेभी दुहबी सुनसरीबीच सम्झौतापत्रमा हस्ताक्षर भएको हो ।
मेयर तिलक राई, उपमेयर मञ्जु भण्डारी, प्रमुख प्रशासकीय अधिकृत विदुरप्रसाद खनालको उपस्थितिमा ठेकेदार कम्पनीसँग सम्झौतापत्रमा हस्ताक्षर भएको धरान उपमहानगरपालिकाका वरिष्ठ इञ्जिनियर सुरज श्रेष्ठले जानकारी दिए ।

ठेकेदार कम्पनीले १५ दिनभित्रमा निर्माण कार्यलाई अगाडि बढाउने इञ्जिनियर श्रेष्ठले बताए । इञ्जिनियर श्रेष्ठका अनुसार बसपार्क करसहित गरेर २३ करोड १५ लाख ३ हजार २ सय ९६ रुपैयाँ ४६ पैसामा निर्माण सम्पन्न गर्न ठेकेदार कम्पनिसँग सम्झौतापत्रमा हस्ताक्षर भएको हो । ‘३ वर्षभित्रमा निर्माण सम्पन्न गर्नुपर्ने हुन्छ । ५० प्रतिशत नेपाल सरकारको अनुदान ३ वर्षभित्रमा प्राप्त हुन्छ भने बाँकी ५० प्रतिशत स्रोत धरान उपमहानगरपालिकाले व्यवस्थापन गर्नुपर्ने हुन्छ ।’
मेयर राईले उपमहानगरपालिकाले लामो समयदेखि थाति रहेको योजनालाई सम्झौता गरेर अगाडि बढाउन पाएको बताए । धरानको विकास र समृद्धिको लागि विगत लामो समयदेखि बसपार्क निर्माण योजना थियो । अब चाँडै पुरा हुने भयो । ठूला योजनाहरुमा विभिन्न टिकाटिप्पणी, सल्लाह सुझाव, विवादहरु हुने गरेको मेयर राईको भनाई थियो । चाडोभन्दा चाडो बसपार्क निर्माण सकियो भने धरानको सुन्दरता थप झल्किने मेयर राईको धारणा छ ।
उपमेयर मञ्जु भण्डारीले ३० वर्षदेखि जनप्रतिनिधिले देखेको सपना अब पूरा हुन लागेको बताए । उपमेयर भण्डारीले पनि समयमा नै योजना सम्पन्न गर्न आग्रह गरे । निर्माण व्यवसायी गिताञ्जली जेभीका सञ्चालक सपन दासले अब १५ दिनभित्रमा काम निर्माण थाल्ने बताए । तोकिएको समयभित्र निर्माण पूरा गर्ने पनि उनले प्रतिबद्धता जनाए ।