२०४८ सालमा होटल म्यानेमेण्टको कोर्ष पढेका गगनमान श्रेष्ठ धरानस्थित युएन, नवोदय कलेजका होटल म्यानेजमेण्ट कोअर्डिनेटरका रुपमा कार्यरत् छन् । सोल्टी होटललगायतमा काम गरी अनुभव समेत सङ्गालीसकेका श्रेष्ठ होटल म्यानेजमेण्ट ‘स्कोप’ को सङ्काय हो भन्छन् । उनी यो सङ्काय पढिसकेपछि अन्तर्राष्ट्रियस्तरमा पनि बिक्ने बताउँछन् ।
होटल म्यानेजमेण्ट भनेपछि भान्छामा काम गर्ने भन्ने मानसिकता रहेपनि अहिले यो विषयले चिर्दै गएको उनी बताउँछन् । ‘यो विषय पेशागत विकास र व्यवस्थापन हो भन्ने बुझाइ कमैमा छ’, उनी भन्छन्, ‘तर अहिले आएर अधिकांशले बुझ्न थालिसकेका छन् ।’
अरू विषयभन्दा होटल म्यानेजमेण्टमा रुचि भएको र पढ्नासाथ स्वदेश तथा विदेशमा छिट्टै रोजगारीको अवसर पाइने भएकाले यो विषय धेरै विद्यार्थीको रोजाइको केन्द्र बन्ने गरेको उनी बताउँछन् । नेपाल पर्यटन प्रवद्र्धनको क्षेत्र बनेकाले होटल व्यवसायको सम्भावना पनि बढ्दै गएको उनको बुझाइ छ । ‘यसैले, होटल म्यानेजमेण्ट विद्यार्थी, अभिभावकको रोजाइको विषय बन्दै गएको छ ।’ उनी थप्छन् ।
नेपालमा ‘होटल म्यानेजमेण्ट’ शिक्षाको महत्व र सान्दर्भिकता बढिरहेको उनी बताउँछन् । ‘यसको महत्व बढिरहेको छ । पहिला–पहिला यसलाई भान्से बन्न पढेको हो समेत भन्थे तर अहिले त्यो परिवर्तन भएको छ । होटल म्यानेजमेण्ट पढ्ने विधार्थीहरुसँग भोलिका दिनमा होटलमा काम गर्ने या आफ्नै होटल वा रेष्टुरेन्ट व्यवसाय सञ्चालन गर्ने जस्ता दुईवटा कुरा जोडिएका हुन्छन् । होटल म्यानेजमेण्ट पढेका अधिकांश विद्यार्थी विदेशसम्म पुग्ने गरेका छन् । स्वदेशमै पनि पर्यटकहरु बढ्दो छन् । यहाँ पनि होटल म्यानेजमेण्ट शिक्षा लिएका विद्यार्थीले सेवा दिइरहेको अवस्था छ ।’ उनी थप्छन् ।
प्रस्तुत छ उनीसँग हाम्रो कोशी आवाज डटकमले गरेको भिडियो कुराकानीः