धरानः धरानका महिला फुटबल टिम ‘राष्ट्रिय उपमेयर कप फुटबल’ प्रतियोगितामा भिड्ने भएका छन् ।
प्रतियोगितामा धरान उपमहानगरपालिकाले महिला फुटबल टिमलाई सहभागिता गराउने जनाएको छ । मेयर तिलक राईको सभापतित्वमा शनिबार बसेको छलफलले आगामी काक्तिकमा आयोजना हुने ‘राष्ट्रिय उपमेयर कप फुटबल’ प्रतियोगितामा धरान उपमहानगरपालिकाबाट महिला फुटबल टिम सहभागिता गराइने निर्णय गरेको हो ।
छलफलले धरानका महिला फुटबल टिम तयार बनाउन तालिम सञ्चालन गर्न सूचना प्रकाशित गरी इच्छुक महिला खेलाडीहरुलाई आह्वान गर्ने निर्णय गरेको छ । साथै, धरानका विभिन्न वडामा उपलब्ध खेलाडीहरु तथा धरान महिला फुटबल क्लबका खेलाडीहरुलाई फुटबल उपलब्ध गराइ तत्काल अभ्यास सञ्चालन गर्ने, गराउने निर्णय पनि गरेको छ । छलफल पश्चात मेयर राईले महिला खेलाडीहरुलाई चार थान फुटबल हस्तान्तरण गरेका छन् ।
महिला खेलाडीहरुलाई अनुशासन भएर, लगनशील भएर फुटबल अभ्यास गर्न मेयर राईले आग्रह गरे । महिला फुटबल टिमलाई उजागर गर्नका लागि धरान उपमहानगरपालिकाको साथ सहयोग रहने पनि मेयर राईले प्रतिबद्धता व्यक्त गरे ।
छलफलमा धरान महिला फुटबल टिमका प्रशिक्षक भगवती राना मगरले महिला फुटबल खेललाई विकास गर्नका स्थानीय सरकारको मुख्य भूमिका हुनुपर्ने बताइन् । प्रशिक्षक राना मगरले अहिले अधिकाङ्श महिला खेलाडीहरुको परीक्षा सञ्चालन हुन गइरहेको कारण विगतमा जस्तो धेरै समय फुटबल अभ्यास नहुने जानकारी दिइन् । उनले समय मिलाएर फुटबल अभ्यास गराउने बताइन् । छलफलमा धरान महिला फुटबल क्लबकी क्याप्टेन सुस्मिता राईले फुटबल खेल्न घरपरिवारले नै प्रोत्साहित गरेको बताइन् ।