धरानः धरान उपमहानगरपालिकाले धनकुटे रोडको खाल्डाखुल्डी पुर्ने काम शुक्रबारदेखि शुरु भएको छ ।
उपमहानगरपालिकाको योजना शाखाका अनुसार खाल्डाखुल्डी पुर्नका लागि ५ लाख रुपैयाँ बजेट छुट्याएर कालोपत्रे गर्ने तयारी गरेको हो ।
बीपी प्रतिष्ठान जानका लागि मुख्य बाटोको रुपमा रहेको यस बाटोमा खाल्डाखुल्डीका कारण बिरामी तथा अस्पताल जाने मानिसहरुलाई समस्या हुने गरेको थियो ।
५ लाख रुपैयाँ बजेट छुट्याएर कालोपत्रे (पिच) गर्नुभन्दा अगाडिको (खाल्डाखुल्डी पुर्ने) काम आजबाट थालिएको उपमहानगरपालिकाका इञ्जिनियर सुरज श्रेष्ठले जानकारी दिए । ‘धनकुटे रोडको खाल्डाखुल्डी पुर्ने काम सुरु भयो, कालोपत्रे गर्नका लागि धेरै खर्च लाग्छ, अन्य स्रोतबाट कालोपत्रे गर्ने योजना बनाउँछौं ।’
कालोपत्रे गर्नका लागि ५ लाखभन्दा बढी बजेट ल्याउन टेण्डरको प्रक्रियामा जानुपर्ने भएकोले लगभग २ महिना लाग्ने इञ्जिनियर श्रेष्ठले बताए ।
यसअघि हर्क साम्पाङको नेतृत्वमा धरान उपमहानगरपालिका पुगेको टोलीले धरानका खाल्डाखुल्डी पुर्न आग्रह गरेको समाचार हाम्रो कोशी आवाजमा प्रकाशित भएको थियो । उनीहरुले स्वास्थ्य संस्थामा जाने बाटो नै खाल्डाखुल्डी भएको र कुनैपनि बेला एम्बुलेन्स नै दुर्घटनामा पर्न सक्ने सम्भावनालाई मध्यनजर गर्दै त्यहाँका खाल्डाखुल्डी पुर्न आग्रह गरेका थिए । धरानका अधिकांश सडकमा खाल्डाखुल्डी छन्, तर धेरैजसो भोटेपुलदेखि बुद्धचोकसम्म जाने सडकमा त पाइलैपिच्छे खाल्डाखुल्डी छ ।