धरानः नेपाल कम्युनिष्ट पार्टी (माओवादी केन्द्र) धरानमा पनि तीब्र विवाद शुरु भएको छ ।
यसैबीच धरान नगर सदस्य तथा वडा नं. ३ सचिव मिङ्मा भोटेले पार्टीबाट राजीनामा दिएका छन् । पार्टीभित्र गुटउपगुट हावी भएको भन्दै उनले राजीनामा दिएको जानकारी दिए । ‘खासमा पार्टीभित्र अहिले जिल्ला तह हुँदै धरानसम्म पनि तीब्र विवाद छ, पार्टीको विवाद नमिलेसम्म म माओवादी केन्द्रको कुनै पनि गतिविधिमा सामेल हुने छैन ।’ उनले भने ।
उनका अनुसार जिल्लामा यसअघि जिल्लाले निर्णय गर्दै धरान उपमहानगरपालिकामा चोत्लुङलाई अध्यक्ष बनाएको थियो । तर जिल्लाको निर्णय खारेज गर्दै प्रदेश कमिटीले अइन्द्रविक्रम बेघालाई अध्यक्ष तथा इन्चार्ज तोक्दै चोत्लुङलाई सह-इन्चार्ज बनाएको जनाइएको छ ।
उनले गुट बनाई एक अर्कालाई कारवाही गर्नेदेखि कार्यकर्तालाई गुटमा हाल्न, खुल्न बाध्य बनाइने गरेको बताए । ‘अहिले पनि गुटउपगुटमा खुल्नुपर्छ भन्ने दबाव आइरहेको नै छ, केन्द्रमा विवाद नै छैन, यहाँ किन विवाद यसमा चित्त बुझेको छैन’, उनले थपे, ‘म त कुनै पनि गुटउपगुटमा खुल्दिनँ, पार्टीलाई राम्रो बनाऔं भन्ने हो । तर त्यो पनि पार नलागेपछि राजीनामा दिएँ ।’
यसअघि पनि माओवादी केन्द्रका केन्द्रीय सदस्य समेत भइसकेका हरि लिम्बू, युवा नेता मिलन चाम्लिङलगायतले पार्टी छोडेर एमालेमा पूर्णरुपमा खुलेर लागिसकेका छन् । हरि अहिले नेकपा एमालेको प्रदेश कमिटी सदस्य बनेका छन् ।
‘माओवादी केन्द्रमा जसरी गुट–उपगुट हावी हुँदै व्यक्तिको सीमित स्वार्थको लागि पार्टी र आन्दोलनलाई नै खतरा हुनेगरी काम गर्नुभएन’, उनले भने, ‘मेरो राजीनामा यस्तै प्रवृत्तिविरुद्धको हो, पार्टीलाई सुदृढ गर्दै आन्दोलनको रक्षा गर्दै एकजुट भएर संगठन विस्तार गर्दै अझै बलियो र ठूलो पार्टी बनाउने समयमा नेतृत्व आफ्नो स्वार्थपूर्तितिर हिँडिरहेको मैले देखेको छु, जबसम्म गुटको अन्त्य भई स्वतस्फुर्त पार्टी बन्दैन तबसम्म जिम्मेवारीमा नफर्किने घोषणा गर्दछु ।’