धरानः धरानमा नेकपा एमाले धरान नगर कमिटीको विवाद साम्य भएन । एमालेमा विवाद बढ्दै जाँदा अहिले फुटेकैजस्तो नै देखिएको छ ।
छिन्नभिन्न भएर दुई समूहले भिन्दाभिन्दै स्थानमा कार्यक्रममात्रै गरेनन्, छुट्टाछुट्टै कमिटी पनि निर्माण गरेका छन् । आफू आफू नै आधिकारिक हो भनेर दाबी गर्दै उनीहरुले कमिटी निर्माण गरेका हुन् । मङ्गलबार मात्रै उनीहरुमध्ये संस्थापन पक्ष भनिएकाले धरान–१० स्थित सैनिक भवनमा कार्यक्रम आयोजना गरेको थियो भने संस्थापनइतर अर्थात् जेठ २ अघिको कमिटी (नारायण सुवेदी समूह) भनिएकाले धरान–१५ स्थित होटल इजी राइडरमा कार्यक्रम आयोजना गरेको थियो ।
धरानमा १० बुँदे सहमतिबमोजिम पार्टी संरचनालाई २०७५ जेठ २ मा फर्काउने वा नफर्काउने भन्नेबारेमा विवाद देखिएपछि अहिले यस्तो रुप बनेको हो ।
मङ्गलबार धरान–१५ स्थित होटल इजी राइडरमा भएको ८ औं नगर अधिवेशनले नारायण सुवेदीको अध्यक्षतामा ८५ सदस्यीय कमिटी सर्वसम्मत चयन भएको छ । कमिटीको उपाध्यक्षमा राजमणी निरौला, सचिवमा पारस काङमाङका साथै सहसचिवद्वयमा राजेन्द्र राई र दिवस राई सर्वसम्मत चयन भए । नव निर्वाचित अध्यक्ष सुवेदीले आफूहरुकै कमिटी संस्थापन रहेको दावी गरे ।

यस्तै, संस्थापन पक्ष भनिएको बुधबार भएको बन्द सत्रले अध्यक्षमा हर्कजङ एभेङलाई सर्वसम्मत चयन गरेको छ । यस्तै, उपाध्यक्षमा सविता राई, सचिवमा सुदेश चापागाईलाई सर्वसम्मत चयन गरेको छ भने सहसचिवद्वयमा जोन राई र सुमन लिम्बू चयन भएका छन् । अध्यक्ष एभेङले पनि आफूहरु नै आधिकारिकरुपमा संस्थापन रहेको दावी गरे ।
अध्यक्ष सुवेदीले पदको भागबण्डाका कारण विवाद देखिएको बताए । ‘विशेषतः ६०–४० मा भागबण्डा नमिलेको हो’, उनले भने, ‘उहाँहरुले ६० प्रतिशत माग्नुभयो, हामीले दिएनौं ।’ उता अध्यक्ष हर्कजङले पुरै नेतृत्व आफूहरुकै हुनुपर्ने भन्दै सुवेदी समूह बाङगिएपछि वार्ता भाँडिएको बताए ।
कतिपय एमाले नेताहरुले अहिले सामाजिक सञ्जालमा आक्रोश समेत पोखिरहेका छन् । कसलाई आधिकारिक मान्ने भन्नेबारेमा कार्यकर्तामा अन्योलता सिर्जना भएको पाइएको उनीहरुले बताएका छन् ।
अर्कोतिर यसअघि केपी ओली खेमा र माधव नेपाल खेमाका कार्यकर्ता जस्तो देखिएकोले यस्तो भएको एक नेताले बताउँछन् । यसअघि धरानमा धरानमा केपी समूहभन्दा माधव समूह नै दर्बिलो रहेको र त्यही तागत देखाउन खोज्दा यो परिणाम आएको एकथरीको तर्क छ भने अर्कोथरी यसअघि केपी प्रम हुँदा विरोध गर्दै सडकमा आउने र केपीलाई च्याप्दै हिँड्नेबीचको लडाइँ भएको पनि तर्क राख्दै आएको छ । ‘अहिले पनि केपी र माधव समूहजस्तै छर्लङ्गै छुट्टिएको छ’, उनी थप्छन्, ‘यसअघि केपीले राम्रो काम गरेनन् भनेर सडकमा विरोधका नारा उराल्ने र एमाले बचाउनुपर्छ भन्दै दुःख गर्नेहरुबीच कुरा नमिल्दा यस्तो भएको हो ।’