सुनसरीः धरान उपमहानगरपालिका–१५ बस्ने ३४ वर्षीया छुङकु मगर (राई) लाई श्रीमानले कुटपिट गर्दा मृत्यु भएको छ ।
गत कार्तिक १८ गते बेलुका ६ बजेको समयमा छुङकुका श्रीमान ४१ वर्षीय महेन्द्र राईले कुटपिट गर्दा उनी घाइते भएकी थिइन् । घाइतेलाई केहीदिन घरमै सामान्य उपचार गरी २२ गते थप उपचारको लागि बीपी कोइराला स्वास्थ्य विज्ञान प्रतिष्ठान लगिएकोमा उपचारको क्रममा मृत्यु भएको इलाका प्रहरी कार्यालय धरानका डिएसपी नरेन्द्र कुँवरले जानकारी दिए ।
घटनाको जानकारी पाउनासाथ इलाका प्रहरी कार्यालय धरानबाट खटिएको प्रहरी टोलीले राईलाई नियन्त्रणमा लिएको उनले जानकारी दिए । हत्या आरोपमा पक्राउ परेका राईको सम्बन्धमा प्रहरीले थप अनुसन्धान गरिरहेको उनले जानकारी दिए । ‘खासमा उनीहरुबीच घरायसी झगडा भएको पाइयो’, डिएसपी कुँवरले थपे, ‘अहिले पनि अनुसन्धानकै प्रक्रियामा छौं, उनलाई नियन्त्रणमा लिएर थप अनुसन्धान भइरहेको छ, थप कारण खुलिहाल्छ ।’