धरानः धरानमा नेकपा एमालेको विवादले उग्ररुप लिँदै गएको छ । यस्तै, विवाद सुनसरीसम्म पनि पुगेको छ ।
दुई समूह मिलेर छुट्टाछुट्टै कमिटी बनाएको धरानमा अहिले झन विवाद बढ्दै गएको छ । यस्तै, सुनसरीमा पनि विवाद तीब्र छ ।
यसै क्रममा धरान नगर सचिवालय सदस्य तथा नेपाल उत्पीडित जातीय मुक्ति समाजका केन्द्रीय सदस्य गोविन्द विकले एमाले छाडेको घोषणा गरेका छन् । उनले एक विज्ञप्ति जारी गर्दै एमाले छाडेको घोषणा गरेका हुन् । उनले आफूले एमाले चटक्कै छोडेको बताएका छन् । ‘एमाले केही व्यक्तिहरुको कम्पनीजस्तो भइसकेको छ’, उनले भने, ‘त्यही भएर एमालेमा नफर्किने गरी चटक्कै छाडेको छु ।’
विज्ञप्तिमा भनिएको छ, ‘सीमित व्यक्तिगत स्वार्थका कारण पार्टीका इमान्दार नेता, कार्यकर्ता अपमानित र निराश पार्ने नेताहरुको पछि लागिरहनु उचित नभएको हुनाले कार्तिक २५ गतेबाट नफर्किने हिसाबले एमाले छोडेको घोषणा गर्दछु ।’
अब कुन पार्टीमा प्रवेश गर्ने भन्नेबारेमा आफू सरसल्लाहमै रहेको उनले जानकारी दिए ।