ताप्लेजुङः ताप्लेजुङको फङलिङ नगरपालिका–८ बाहनन्दे मेची लोकमार्गमा झापाबाट ताप्लेजुङतर्फ आउँदै गरेको वानटेस ट्याक्टर आफै अनियन्त्रित भई सडकदेखि अन्दाजी ३० मिटर तल झरी दुर्घटना हुँदा चालकको मृत्यु भएको छ ।
मृत्यु हुनेमा ट्याक्टर चालक मोरङ मिक्लाजुङ गाउँपालिका ९ मधुमल्लाका २७ वर्षीय पुष्प विक रहेका छन् । बिहीबार बेलुका साढे ६ बजे भएको दुर्घटनाबाट गम्भीर घाइते भएका विकको उपचारको लागि बिर्तामोड ल्याउने क्रममा बाटैमा मृत्यु भएको हो । घटनाको बारेमा थप अनुसन्धान भइरहेको जिल्ला प्रहरी कार्यालय ताप्लेजुङले जनाएको छ ।
यस्तै, विराटनगरमा दुर्घटना हुँदा एकजनाको मृत्यु भएको छ । कोशी राजमार्गको विराटनगर–४ नम्बर नखुलेको सवारी साधनले ठक्कर दिँदा जनकपुर–३ का २७ वर्षीय निखिल पञ्जियारको मृत्यु भएको प्रहरीले जनाएको छ ।
प्रहरीका अनुसार उनी प्र.२–०२–००३ प २१८९ नम्बरको मोटरसाइकलमा सवार थिए । ठक्करले गम्भीर घाइते उनको उपचारका लागि कोसी अस्पताल लगिएकामा चिकित्सकले केहीबेरपछि मृत घोषणा गरेका थिए ।
यसैबीच झापाको झापा गाउँपालिका ६ भृकुटी चौककी ६२ वर्षीया हरिमाया विकको करेन्ट लागेर मृत्यु भएको छ । हरिमायाको आफ्नै बारीबाट नरिवलको हाँगा बोकी आउने क्रममा घरको बिजुलीको मिटरबाट निस्केको तारलाई बोकेको हाँगाले चुडाउँदा करेन्ट लागि घटनास्थलमै मृत्यु भएको थियो । घटनाको बारेमा थप अनुसन्धान भइरहेको १ नम्बर प्रदेश प्रहरी कार्यालय विराटनगरका सूचना समन्वय अधिकृत प्रहरी उपरीक्षक नविनराज राईले जानकारी दिए ।