धरानः आफूले स्वतः जीत हात हासिल गर्छु भन्दै दावी गर्दै आएका सुजेन्द्र तामाङ अन्ततः नेपाली कांग्रेसको १४ औं महाधिवेशन अन्तर्गत सुनसरी क्षेत्र नं. १ को क्षेत्रीय सभापतिमा विजयी बनेका छन् ।
मङ्गलबार राति प्राप्त मत परिणामअनुसार उनले ३९३ मत ल्याएर विजयी बने । उनका निकटम प्रतिद्वन्द्वी लक्ष्मी खतिवडाले २१५ मत पाइन् । विजयी तामाङले खतिवडाभन्दा १७८ मत बढी पाए ।
यसैगरी, सचिवमा तामाङ प्यानलका उम्मेदवार महेन्द्र प्रधानले ३६४ र केशव पुरीले ३२१ मत पाए भने सचिव पदमा खतिवडा प्यानलका उम्मेदवारद्वय देवेन्द्र लिम्बूले २९३ र जयबहादुर लिम्बूले १७२ मत पाएका छन् । यस्तै, सहसचिव पदमा तामाङ प्यानलका भोजकुमार न्यौपानेले ३७२ र सुमित राईले ३८२ मत पाएर विजयी भए । सचिव पदमा खतिवडा प्यानलका उम्मेदवारद्वय नविन ढकालले १६१ र नादर राईले २०७ मत मात्र पाएर पराजित भए ।
विजयी बनेका तामाङ पौडेल–कोइराला समूहमा थिए भने खतिवडा देउवा समूहमा थिइन् । जीतपछि सबै मतदातालाई धन्यवाद दिँदै तामाङले पार्टीलाई एकढिक्का बनाएर लैजाने बताए । हाम्रो कोशी आवाज डटकमसँग कुरा गर्दै उनले नयाँ विचारको जीत भएको उनको धारणा थियो । विजय घोषणाअघि नेता, कार्यकर्ताहरुले मतगणना भइरहेको स्थानदेखि बाहिर नाचगानलगायको कार्यक्रम पनि गरे ।
तस्वीरहरुः लक्ष्मण थापा