धरानः गोधुली क्लबको आयोजना प्रत्येक वर्ष धरानमा आयोजना भइरहेको गोधुली कप फुटबल प्रतियोगिता यसवर्ष पुस २४ गतेदेखि हुने भएको छ ।
क्लबका पदाधिकारीकारी, सल्लाहकार तथा संस्थापकहरुको संयुक्त बैठकले यसवर्ष हुने २२ औं गोधुली टुबोर्ग फुटबल रनिङ कपको आयोजना यही पुष २४ गतेदेखि माघ ८ गतेसम्म गर्ने निर्णय गरेको छ । धरान–१७ को गोधुली क्लबले धरानका वडाहरुको टिमलाई प्रतियोगितामा सहभागीता गराउँदै आएको छ ।
धरानबाट व्यवसायिक फुटबल खेलाडी उत्पादन गर्ने उद्देश्यले प्रतियोगिता सञ्चालन गरिरहेको क्लबका उपाध्यक्ष सतिस केसीले जानकारी दिए । गतवर्षको बिजेतालाई नगद रु १ लाख ११ हजार १ सय ११ रुपैयाँ र उपविजेतालाई ५५ हजार ५ सय ५५ रुपैयाँ प्रदान गरिएको थियो ।
यसवर्ष पुरस्कार रकम वृद्धि गर्ने लक्ष्य लिइएको भएपनि कति पुरयाउने भन्ने निर्णय नभइसकेको आयोजक गोधुली क्लबका उपाध्यक्ष सतिस केसीले जानकारी दिए । गतवर्ष १४ नं. वडाले उपाधि जितेको थियो भने १६ नं. वडा उपविजेता भएको थियो ।