धरानः धरान-९ स्थित विष्णु मेमोरियल सेकेण्डरी स्कुलमा अध्ययन गरेका छात्र आशिष कार्की नेपाल प्रथम बन्न सफल भएका छन् ।
कार्कीले काठमाडौं विश्वविद्यालय (स्कुल अफ साइन्स एण्ड स्कुल अफ इन्जिनियरिङ) द्वारा सञ्चालित ब्याचलर्स अफ इन्जिनियरिङको प्रवेश परीक्षामा सर्वोत्कृष्ट नतिजा ल्याएर नेपालभरीका परीक्षार्थीलाई पछि पारेको कक्षा-११ र १२ का कोअर्डिनेटर नविन शाक्यले जानकारी दिए । उनका अनुसार छात्र कार्कीले १५४० प्राप्ताङ्कका साथ नेपाल प्रथम बनेका हुन् ।
यस्तै, गत मङ्सिर १७ गते आएको कक्षा-१२ को नतिजामा शत प्रतिशत विद्यार्थी उत्तीर्ण हुन सफल भएको प्रिन्सिपल वेनिन्द्र कटुवालले जानकारी दिए । उनका अनुसार २१ जना ‘ए’ प्लस, ११२ जना ‘ए’, ३४ जना ‘बि’ र १ जना विद्यार्थी ‘सी’ प्लस ग्रेड ल्याएर उत्तीर्ण भएका छन् । उनले कक्षा–१२ मा १६८ परीक्षार्थी सहभागी थिए । उनका अनुसार यो नतिजा धरानलगायत सुनसरी जिल्लामै राम्रो हो ।
यसअघि पनि एसईई र कक्षा-११ र १२ का विद्यार्थीले उत्कृष्ट नतिजा निकाल्दै आएको उनले जानकारी दिए । धरानमा नाम चलेको र देशभरीका स्कुलमध्ये टप २० सम्ममा पर्न सफल विष्णुले यसअघि पनि गुणस्तरीय शिक्षा प्रदान गर्दै अभिभावक, विद्यार्थीको मन जित्दै आएको छ । हिमाल खबर पत्रिकाले गरेको सर्वेक्षणमा देशभरका स्कुलमध्ये विष्णु टप २० सम्ममा पर्दै आएको छ । ‘यी सबै उत्कृष्ट नतिजाको श्रेय मेहनती शिक्षक, अभिभावकहरुमा जान्छ’, प्रिन्सिपल कटुवालले भने ।