धरानः धरानस्थित केन्द्रीय प्रविधि क्याम्पस हात्तिसारमा प्रदेश १ का मुख्यमन्त्री राजेन्द्रकुमार राई आएका छन् । माइक्रोबायोलोजी ग्रुपले आयोजना गरेको प्रसिद्ध वैज्ञानिक लुईस पाश्चरको बर्थडे सेलिब्रेसन कार्यक्रमको उद्घाटनका लागि यहाँ आएको कार्यक्रम संयोजक एवम् अध्यापक अर्जुन घिमिरेले जानकारी दिए । कार्यक्रममा प्राध्यापक पशुपति मिश्र र गीता भट्टराईलाई सम्मान गरिएको थियो । कार्यक्रमका प्रमुख अतिथि मुख्यमन्त्री राईले उनीहरुलाई खदा र सम्मानपत्रले सम्मान गरेका थिए । कार्यक्रममा कर्मचारी सूर्यनारायण श्रेष्ठलाई समेत सम्मान गरिएको थियो ।
कार्यक्रममा कोरोनाको पहिलो चरणमा ५ हजारभन्दा बढी स्वाब संकलन गरेका विद्यार्थी आशिष प्रधान, आकृति गुरुङ, मोजेश चौधरी, मिशा शाक्यलाई पनि सम्मान गरिएको थियो । उनीहरुलाई पनि प्रमुख अतिथि मुख्यमन्त्री राईले सम्मान गरेका थिए ।
कार्यक्रमका क्याम्पस प्रमुख दिलकुमार लिम्बूले कलेजका लागि अध्यापक अभाव रहेको मुख्यमन्त्री राईलाई जानकारी गराए । उनले पार्टटाइम अध्यापकले अहिले काम चलाइरहनुपरेको पनि बताए । उनले सरकारले बिएस्सी न्युट्रीसन, डाइटिसियन विषयमा पास भएका विद्यार्थीहरुका लागि लोकसेवा नखुलाइदिँदा समस्या भएको बताए । उनले प्रदेश सरकारले केन्द्रसम्म पहलकदमी गर्नुपर्ने बताए । कम्प्युटर ल्याब, साढे ३ करोडमा छात्रबास निर्माण सकिन लागेको त्यसका लागि आवश्यक पर्ने भौतिक पूर्वाधारमा सहयोग गर्न उनले आग्रह गरे ।
कार्यक्रममा बोल्दै मुख्यमन्त्री राईले कलेजको भौतिक पूर्वाधारलगायतका अन्य कुरामा सहयोग गर्ने आश्वासन दिए । कार्यक्रम माइक्रोबायोलोजी विभागीय प्रमुख धिरेन लिम्बूको अध्यक्षतामा कार्यक्रम सम्पन्न भएको थियो । कार्यक्रममा सहायक क्याम्पस पमुख प्राध्यापक बबिता अधिकारीले क्याम्पसको मिसन, भिजन र गोलका बारेमा प्रकाश पारेकी थिइन् भने पाश्चरको जीवनीबारे छात्रा शुभेच्छा सुब्बाले प्रष्ट्याएकी थिइन् ।
प्रसिद्ध लुई पाश्चर एक डाक्टर वा सर्जन थिएनन्, तर एक रसायन र भौतिक विज्ञ थिए । उनी माइक्रोबायोलोजीको पिताहरुमध्ये एक मानिन्छन् ।
तस्वीरहरुः शेखरनाथ जोगी