धरानः धरान–१२ स्थित पब्लिक हाइस्कुलमा प्राविधिक शिक्षालयका लागि भवन बनेको छ ।
सो भवनको प्रधानमन्त्री शेरबहादुर देउवाले मङ्गलबार उद्घाटन गरेका छन् । पब्लिक माविको खेल मैदानमा मङ्गलबारदेखि शुरु भएको धरान उत्सवको उद्घाटन गर्न आइपुगेका उनले सो भवनको उद्घाटन गरेका हुन् । प्राचार्य इन्द्रमोहन झाका अनुसार सो भवन प्राविधिक विषय पठनपाठनका लागि बनेको हो । कक्षा–९ देखि १२ सम्म इलेक्ट्रिकल इन्जिनियरिङ पठनपाठन हुँदै आएको र सो भवनमा अब पठनपाठन शुरु हुनेछ ।
सप्ताह पुराण, सरकार, आन्तरिक स्रोतबाट सो भवन बनेको उनले जानकारी दिए । यस्तै, मङ्गलबार नै प्रधानमन्त्री देउवाले खेल मैदानसम्म जाने टायल विछ्याएर चिटिक्क बनाइएको सडकको समेत उद्घाटन गरेका छन् । नगरपालिका र विद्यालयको साझेदारीमा त्यहाँ टायल बिछ्याइएको हो ।
यसैबीच प्रधानमन्त्री देउवाले पब्लिकमा बन्दै गरेको ‘हेल्थ पार्क’ को पनि अवलोकन गरेका छन् । विद्यार्थीले त्यहाँ अब व्यायाम गर्न पाउँछन् । टिफिन टाइम, खाली टाइम, छुट्टीमा विद्यार्थीले व्यायाम गर्न पाउने प्रधानाध्यापक झाले जानकारी दिए ।