धरानः उदयपुरको बेलका नगरपालिका–६ का ४० वर्षीय गोविन्द मगरलाई पक्राउ गरिएको छ ।
साउदी अरेबियाबाट १७ वर्षपछि उनी पक्राउ परेका हुन् । इन्टरपोलबाट रेड नोटिस जारी भएका उनलाई साउदी अरबबाट बुधबार नेपाल ल्याइएको छ ।
मगरले २०६१ मंसिर १३ गते मानबहादुर तामाङलाई हत्या गरेको कसुरमा जिल्ला अदालत उदयपुरले पक्राउ अनुमति दिएको थियो । इलाका प्रहरी कार्यालय रामपुर ठोक्सिलाको अनुरोधमा प्रहरी प्रधान कार्यालय इन्टरपोल शाखामार्फत् इन्टरपोल महासचिवालयबाट अन्तर्राष्ट्रियस्तरमा खोजतलास एवं पक्राउका लागि २०७७ माघ २६ गते मगरमाथि रेड नोटिस जारी गरिएको थियो । उनलाई कानुनी कारबाहीका लागि इलाका प्रहरी कार्यालय रामपुर ठोक्सिला उदयपुरलाई बुझाइएको प्रहरीले जनाएको छ ।

यस्तो थियो घटना
२०६१ मंसिर १३ मा राति दुईजना युवा मानबहादुर तामाङको घरमा गएका थिए । उनीहरुले खुकुरी झिकेर ६३ वर्षका मानबहादुरलाई आक्रमण गरे, अनि लगभग मृत्यु भएको यकिन गरेपछि त्यहाँबाट भागे । राति ८ बजे आक्रमणको शिकार भएका मानबहादुरको धरानस्थित बिपी कोइराला स्वस्थ्य विज्ञान प्रतिष्ठानमा मंसिर १७ मा मृत्यु भएको थियो ।
त्यसदिन उनलाई आक्रमण गर्ने मध्येका थिए–गोवन्द मगर र जयवीर राई उर्फ ‘विजय’ । मानबहादुरलाई ढालेपछि ‘परिवार सखाप पार्छौँ’ भनेर खुकुरी नचाउँदै भागेका उनीहरु मध्येका गोविन्द मगरलाई प्रहरीले साउदी अरेबियाबाट पक्राउ गरिएको हो । हत्यामा संलग्न मुख्य योजनाकार जयवीर अझै फरार छन् ।
मानबहादुर तामाङको छोरी र जयवीर प्रेम सम्बन्धमा थिए । २०६१ मंसिर १३ भन्दा केही दिनअघि जयवीरले फकाएर प्रेमिकालाई भगाउने प्रयास गरेको खुल्न आएको प्रहरीले जनाएको छ । सो कुरा थाहा पाएपछि मानबहादुर र उनकी पत्नीले प्रेम टुटाएर छोरीलाई अर्कैसँग विवाह गरिदिने तयारी गरेका थिए । सो रिसमा जयवीर आफ्ना साथी गोविन्द मगरलाई लिएर साँझ ८ बजेतिर प्रेमिकाको घरमा पुगेका थिए अनि जयवीर प्रेमिकाको बुबासँग निहुँ खोज्दै गर्दा गोविन्द मगरले लुकाएर ल्याएको खुकुरी झिकेर मान बहादुरको टाउकोमा हिर्काएका थिए ।