धरानः धरान बस्दै आएका जुम्ल्याहा दाजुभाइले जुम्ल्याहा दिदीबहिनीसँग वैवाहिक बन्धनमा बाँधिएका छन् ।
केही महिनाअघि धरानमा इन्गेजमेण्ट गरेका उनीहरुले माघ १३ गते बिहीबार उनीहरुले लगनगाँठो कसेका हुन् । मोरङको सुन्दरहरैंचास्थित नेताचोक घर भएका उनीहरुले भोजपुरको च्याङ्ग्रेका दुई जुम्ल्याहा दिदीबहिनीसँग विवाह बन्धनमा बाँधिएका हुन् । शुक्रबार उनीहरुले नेताचोकस्थित घरमा पार्टी पनि दिएका छन् ।
राम–लक्ष्मण कार्की दाजुभाइले गंगा–गमुना कोइरालासँग विवाह गरेका हुन् । उनीहरुको विवाहमा चारजना सँगै देख्दा मान्छेहरूले अचम्म मानेका थिए । ‘हामी त झुक्किएनौं तर पनि तपाईको श्रीमती कुन हो भनेर सोध्ने समेत गरेका छन्’, लक्ष्मणले भने ।
‘जुम्ल्याहा विवाह त धेरै सुनिए तर एकैघरमा दिदीबहिनीसित विवाह गरेको कमै सुनिन्छ’, लक्ष्मी सिजापतिले भनिन्, ‘यो एउटा संयोग हो ।’
सानैदेखि जुम्ल्याहा दिदीबहिनीसँगै विवाह गर्ने इच्छा र सपना रहेको बताउने रामले भने, ‘एकजना आफन्तले भोजपुरमा जुम्ल्याहा दिदीबहिनी छन् भनेपछि आफूहरुले सामाजिक सञ्जालमार्फत् चिनजान बढाएर नजिकिएको हौं, त्यसपछि यो कुरा आफन्तमार्फत् विवाहमा परिणत गर्ने निधोमा पुग्यौं । जे होस् सपना पूरा भयो ।’
यस्तै, तीन दाजुभाइको एकैलग्नमा विवाह समेत भएको छ । जर्मन कार्की राम–लक्ष्मणका ठूलो बुबाका छोरा हुन् । जर्मनले गीता खड्कासँग विवाह गरेका हुन् । जर्मन सशस्त्र प्रहरीमा कार्यरत् छन् भने गीता सेनामा कार्यरत् छिन् ।