धरानः सहिद स्मारक बी डिभिजन लिग फुटबल प्रतियोगिता खेल्न ब्वाइज युनियन क्लबको टिम काठमाडौ प्रस्थान गरेको छ ।
टिममा धराने खेलाडीको बाहुल्यता रहेको छ भने झापा तथा मोरङका खेलाडी सम्मिलत छन् । टोलीलाई एन्फाका एक नं. प्रदेश अध्यक्ष तथा धरान फुटबल क्लबका अध्यक्ष किशोर राईले विदाइ गरे । राईले खेलाडी तथा प्रशिक्षकलाई सुझाव दिदै ए डिभिजनमा बढुवा हुने गरी खेल्न आग्रह गरे । उनले विगतका वर्षहरुदेखि नै ब्वाइज युनियन क्लबमा धरानका खेलाडी खेलिरहेको भन्दै यसवर्ष धरानको गौरव बढाउने गरी खेल प्रदर्शन गर्न अनुरोध गरे ।
टिमका प्रशिक्षक सागर घिमिरेले यसवर्ष गतवर्ष भन्दा राम्रो तयारी गरेको बताए । उनले ए डिभिजनमा उक्लिने लक्ष्यका साथ प्रतियोगितामा सहभागी भएको बताए । क्याप्टेन बिटु तामाङले पनि सबैको साथ सहयोगले हौसला बढेको बताउँदै जिम्मेवारी बढेको प्रतिक्रिया दिए ।
अखिल नेपाल फुटबल संघ (एन्फा) ले ‘बी’ डिभिजन लिग यही फागुन १८ गतेदेखि सुरुआत गर्ने भएको छ । गतवर्ष ब्वाइज युनियन क्लबले चौथो स्थानमा लिग सम्पन्न गरेको थियो । १२ टिम सम्मिलित प्रतियोगिताको कुला ११ खेलमा ७ जित १ बराबरी र ३ हार गरी चौथो स्थानमा रहेर लिग सकेको थियो ।
गतवर्ष ब्वाइज युनियनले फेयर प्ले टिमको उपाधी जितेको थियो । बी डिभिजन लिगमा विभिन्न १४ क्लबको सहभागिता रहनेछ जसमा ब्वाइज युनियन क्लब, झम्सिखेल युथ क्लब, सामाजिक युवा क्लब, बाँसबारी क्लब, खुमलटार युवा क्लब, वीरगञ्ज युनाइटेड क्लब, नयाँबस्ती युवा क्लब र छुरच वोइज युनाइटेड क्लब छन् ।
त्यसैगरी टुसाल युवा क्लब, श्री कुमारी क्लब, रानीपोखरी कर्नर टिम, सरस्वती युवा क्लब, मध्यपुर युथ एशोसियसन र श्री भगवती क्लब सहभागी छन् । सिङ्गल राउण्ड रोविन लिगका आधारमा हुने खेलमा शीर्ष स्थान हासिल गर्ने दुई टोली ए डिभिजन लिगमा बढुवा हुनेछन् । यस्तै पुछारका दुई टोली भने रेलिगेसनमा पर्नेछन् ।