धरानः डायनामिक युथ क्लब, बीपी प्रतिष्ठानको आयोजनामा आइतबारदेखि शुरु भएको दोस्रो अशोक स्मृति बास्केटबलको तेस्रो दिनको खेलमा व्रदस, तरहरा, होराइजन र हाम्रो कलेक्सन टिम विजयी भएका छन् ।
मङ्गलबार भएको खेलमा ब्रदर्सले आयोजक बेलबारीलाई ७१–२४, तरहराले बिर्तामोडलाई ५१–५०, होराइजनले युवा आयोजक डायनामिकलाई ६२–४२ र हाम्रो कलेक्सनले यलम्वरलाई ६१–३० अङ्कको अन्तरले पराजित गरेका थिए ।
तेस्रो दिनको पहिलो खेलमा ब्रदर्स र बेलबारीले प्रत्येक क्वाटरमा १५–२, १६–१४, १८–३ र २२–५ र दोस्रो खेलमा तरहरा र बिर्तामोडले १४–१२, ११–८, ८–१४ र १८–१६ अंक जोडेका थिए । त्यस्तै, तेस्रो खेलमा होराइजन र आयोजक डायनामिले १६–९, १३–११, १९–१२ र १४–१० र चौथो खेलमा हाम्रो कलेक्सन र यलम्बरले १२–२, १८–११, १२–६ र १५–११ अंक जोडेका थिए । पहिलो खेलमा व्रदसका सुजन राईले २२, विर्तामोडका जेनिस सिंहले २२, तेस्रो खेलमा होराइजनका सुदिप राईले २३ र चौथो खेलमा हाम्रो कलेक्सनका विवेक श्रेष्ठले १३ अंक व्यक्तिगत जोडेका थिए ।
लिगकम नकआउटमा सम्पन्न हुने प्रतियोगिताको चौथो दिन बुधबार ब्रदर्स र बिर्तामोड, तरहरा र मिराकलबीच प्रतिस्पर्धा हुनेछ । त्यस्तै, साँझ होराइजन र हाम्रो कलेक्सन र युवा जागृति र यलम्बरबीच प्रतिस्पर्धा हुनेछ ।
फागुन १४ गते सम्म सम्पन्न हुने प्रतियोगिता पूर्व राष्ट्रिय बास्केटबल खेलाडी रवि वास्फोरका दिवंगत बुबा अशोक वास्फोरको स्मृतिमा आयोजना गरिएका हुन् । प्रतियोगिताका बिजेता टिमले नगद ५५ हजार ५ सय ५५ रुपैयाँ, दोस्रोले नगद २५ हजार ५ सय ५५, ट्रफी, मेडल र प्रमाणपत्र प्राप्त गर्नेछ । त्यस्तै, उत्कृष्ट खेलाडीले नगद ४ हजार, बास्केटबल जुत्ता, डिमाण्डु म्यान अफ द म्याचले नगद ३ हजार ट्रफी र प्रमाणपत्र प्राप्त गर्नेछन् ।
लिगकम नकआउटको आधारमा सम्पन्न हुने प्रतियोगितामा प्राविधिक सहयोग धरान र सुनसरी बास्केटबल संघको रहेको छ । प्रतियोगिताको सम्पूर्ण खेल बीपी प्रतिष्ठानको बास्केटवल कोर्टमा सम्पन्न हुनेछ ।
तस्वीरः विकास चम्लिङ राई