धरानः मोफसलको चर्चित फुटबल प्रतियोगिता ‘२३ औं बुढासुब्बा अन्तर्राष्ट्रिय आमन्त्रण गोल्डकप’ आगामी चैतदेखि हुने भएको छ ।
धरानमा आयोजित पत्रकार सम्मेलनमा चैत अन्तिम साता अर्थात् चैत २६ गतेदेखि वैशाख ३ गतेसम्म प्रतियोगिता हुन लागेको धरान फुटबल क्लबका अध्यक्ष किशोर राईले जानकारी दिए ।
धरानस्थित रङ्गशालामा आयोजना हुने प्रतियोगितामा नेपाल र भारत गरी ८ टिमले सहभागिता जनाउने भएका छन् । प्रतियोगितामा काठमाण्डौंमा हालै सम्पन्न भएको शहिद स्मारक लिगको उत्कृष्ट ३ वटा टिम, भारतका २ वटा क्लब र मोफसलको अन्य २ उत्कृष्ट क्लब पनि प्रतियोगितामा सहभागी हुने जनाइएको छ ।
बुढासुब्बा गोल्डकप २२ औं संस्करणको लागि पुरस्कार राशी बिजेतालाई १० लाख, ट्रफी प्रदान गरिनेछ भने उपबिजेताला नगद ५ लाख प्रदान गरिनेछ । प्रतियोगिताको उत्कृष्ट खेलाडीले १ लाख ५० हजार पाउनेछन् भने प्रत्येक खेलको म्यान अफ दि म्याचले १० हजार नगद पुरस्कार पाउनेछन् । प्रतियोगिताको सर्वाधिक गोलकर्ताले नगद २० हजार पाउनेछन् भने उत्कृष्ट डिफेन्स, उत्कृष्ट गोलकिपर, उत्कृष्ट मिडफिल्डर, उत्कृष्ट स्ट्राइकर र उत्कृष्ट प्रशिक्षकले जनही नगद १५ हजार पुरस्कार पाउनेछन् ।

कोरोना महामारीको कारण गत वर्ष २३ औं संस्करण हुन सकेन । धरान उपमहानगरपालिकाले प्रतियोगिता आयोजना गर्न १८ लाख रुपैयाँ प्रदान गर्ने निर्णय भएको अध्यक्ष राईले जानकारी दिए ।
गोर्खा ब्रुअरीको प्रमुख प्रायोजनमा हुने प्रतियोगिताका लागि सार्वजनिक गरिएको अनुमानित बजेटमा कुल आम्दामी ६६ लाख रुपैयाँ अनुमान गरिएको छ । कुल खर्च ५१ लाख ३२ हजार रुपैयाँ हुने अनुमान छ । अध्यक्ष राईले भने ‘यो प्रारम्भिक अनुमान हो, नाफा नै हुन्छ भनेर भन्न सकिन्नँ ।’ उनले गोल्डकपको २२ औं प्रतियोगितामा प्रदेश १ सरकारले विनियोजन गरिसकेको रकम समेत नदिएको र राष्ट्रिय खेलकुद परिषदले पनि अहिले सम्म रकम भुक्तान नगरेको गुनासो सुनाए ।