धरानः धरान उपमहानगरव्यापी अन्तर माविस्तरीय वक्तृत्वकला प्रतियोगितामा एम्स एकेडेमीकी छात्रा उषा कार्की प्रथम भएकी छिन् ।
समाजको हलमा सम्पन्न प्रतियोगितामा शारदा बालिका नमूना माविका छात्रा तुलसा राई द्वितीय, युएन, नवोदय कलेजका दीपेन भण्डारी तृतीय भए भने शारदा बालिकाकै रेजिना विश्वकर्माले सान्त्वना स्थान हात पारिन् ।
धरान–१३ स्थित अमर सेवा समाजले आफ्नो स्थापनाको २५ औं वार्षिकोत्सवको अवसरमा शुक्रबार आयोजना गरेको प्रतियोगितामा प्रथम, द्वितीय, तृतीय र सान्त्वना हुनेलाई कार्यक्रमका सभाध्यक्ष एवम् अमर सेवा समाजका अध्यक्ष भूमिराज लिम्बू, कार्यक्रमका विशेष अतिथि धरान–१३ का वडाअध्यक्ष नेत्रप्रसाद काफ्ले लगायतले क्रमशः ५ हजार, ३ हजार, २ हजार र १ हजार नगद पुरस्कार र प्रमाण–पत्र वितरण गरे ।
‘समाजप्रति युवा विद्यार्थीको दायित्व’ शीर्षकमा गरिएको प्रतियोगिताको निर्णायकहरुमा वरिष्ठ साहित्यकार बम देवान, महेन्द्र बहुमुखी क्याम्पसका उपप्राध्यापक राजेश विद्रोही र नेपाल पत्रकार महासङ्घ सुनसरीका सहसचिव तिर्थ कार्की रहेका थिए ।
विद्यार्थीहरुको ब्यक्तित्व र नेतृत्व विकास गर्दै उनीहरुलाई समाजप्रति उत्तरदायी बनाउने उद्देश्यले प्रतियोगिताको आयोजना गरिएको समाजका अध्यक्ष लिम्बूले बताए । धरान उपमहानगरभरिका विभिन्न विद्यालयका २२ जना विद्यार्थीहरुले प्रतियोगितामा सहभागिता जनाएको समाजका सचिव गोपाल श्रेष्ठ ‘प्रयास’ ले जानकारी दिए ।
प्राध्यापक डा. टङ्कप्रसाद न्यौपानेको प्रमुख आतिथ्यमा भएको कार्यक्रममा वडा नम्बर १३ का महिला वडा सदस्य कमला श्रेष्ठ लगायतको उपस्थिति रहेको थियो ।