धरानः धरान–१६ स्थित सियोन स्कुलको आयोजनामा यही फागुन २४ गते एकदिने सियोन थ्री बाइ थ्री अन्तर विद्यालय महिला पुरुष बास्केटबल प्रतियोगिता हुने भएको छ ।
२४ गते पर्न गएको महिला दिवसको अवसर पारेर प्रतियोगिता आयोजना गर्न लागिएको सियोन स्कुलका प्राचार्य सञ्जीव बान्तावाले कफी पव एण्ड रेष्टोमा आयोजित पत्रकार सम्मेलनमा जानकारी दिए ।
प्रतियोगितामा धरान र धरान आसपासका महिला र पुरुष टिमले सहभागिता जनाउनेछन् । महिलातर्फ ८ टिम र पुरुषतर्फ १५ टिमले सहभागिता जनाउने आयोजकले जानकारी दिएको छ । सहभागी विद्यालयहरुमा आयोजक सियोनसँगै होलिल्याण्ड, समिट, प्रहरी स्कुल, युएन, डिपो, सगरमाथा, तरहरालगायत रहेको छ । प्रतियोगिताको बिजेता टिमले ट्रफी, कफि पव एण्ड रेष्टोको पाँच सय रुपैयाँ बराबरको फुड भौचर र उपविजेताले ट्रफी, मेडल र प्रमाण पत्र प्राप्त गर्नेछन् ।
कोभिड महामारीको कारण दुई वर्षदेखि विद्यार्थीहरुको मनोविज्ञानमा नकारात्मक प्रभाव परेको र कुनै अतिरिक्त क्रियाकलापमा सहभागी नपाएको हुनाले बास्केटवल प्रतियोगिता आयोजना गरिएको विद्यालयका संस्थापक अध्यक्ष एवं निर्देशक खड्गबहादुर थापा मगरले बताए । यससँगै विद्यालयले विद्यार्थीहरुका लागि अन्य रचनात्मक क्रियाकलापहरुको आयोजना गरी पहिलेकै जस्तो सहज र सरल अवस्था तयार पार्ने उनले बताए ।
प्रतियोगिताको फाइनल खेलअघि थ्री पोइन्ट कम्पिटिसनसमेत हुनेछ भने प्रतियोगिताको अघिल्लो दिन २३ गते सोमबार धरानका पत्रकार टिम र सियोन स्कुलका शिक्षकबीच मैत्रीपूर्ण बास्केटबल खेल हुने आयोजकले जनाएको छ । थ्री पोइन्ट कम्पिटिसनका विजेताले नगद एक हजार रुपैयाँ, ट्रफी र प्रमाणपत्र प्राप्त गर्नेछन् ।
पत्रकार सम्मेलन कार्यक्रममा नेपाल पत्रकार महासंघ सुनसरी अध्यक्ष जनकऋषि राई, प्रदेश १ बास्केटबल टिम क्याप्टेन नवीन राई, सियोन स्कुलका खेलकुद संयोजक रोशन राईलगायतको उपस्थिति रहेको थियो ।