धरानः धरानमा तेस्रो अन्तर कर्मचारी मैत्रीपूर्ण ब्याडमिन्टन प्रतियोगिता सम्पन्न भएको छ ।
धरान उपमहानगरपालिकाको आयोजना तथा खेलकुद विकास समितिको संयोजनमा वडा नं. १३ स्थित संघीय इकाई प्रहरी कार्यालयको ब्याडमिन्टन कोर्टमा सोमबारबाट शुरु भएको प्रतियोगिता मङ्गलबार सम्पन्न भएको हो ।
ब्याडमिन्टन प्रशिक्षक देवेन्द्र खड्काका अनुसार प्रतियोगिता तीन क्याटोगोरीमा खेलाइएको थियो । ब्वाइज डबलतर्फ रामकुमार माबो र कुमार राई प्रथम, किशोर अधिकारी र सत्यनारायण राई द्वितीय, राजेन्द्र राई र दीपक मगर, रमेश राई र राजीव राई तृतीय भए । यस्तै, गल्र्स डबलतर्फ स्वेता राई र इच्छा मगर प्रथम, लक्ष्मी तामाङ र एलिसा राई द्वितीय, मिना कुलुङ र सरस्वती सुनुवार, दिपीका कार्की र मन्नु राई तृतीय भइन् । यस्तै, ब्वाईज डबलतर्फ नै अर्जुन राई र सञ्जीव राई प्रथम, रोशन घिमिरे र मुकेश पोखरेल द्वितीय, समिर पौडेल र वसन्त चन्द, प्रदीव बस्नेत र यज्ञ यादव तृतीय भए ।
पुरुष र महिलातर्फका प्रथम, द्वितीय, तृतीय भएका खेलाडीले पुरस्कार बापत क्रमशः नगद ६ हजार, ३ हजार, २–२ हजार रुपैयाँसहित ट्रफी, मेडल र प्रमाणपत्र हात पारे ।
विजेता खेलाडीहरुलाई मेयर तिलक राईले पुरस्कार वितरण गरेका थिए । मेयर राईले विजेता खेलाडीहरुलाई बधाई तथा शुभकामना दिँदै शरीरलाई चुस्त दुरुस्त राख्न दैनिक शारीरिक व्यायाम गर्न सुझाव दिए । दैनिकरुपमा व्ययाम गर्दा स्मरण शक्तिमा हुने ह्रासलाई रोक्न मद्दत गर्ने उनको भनाइ थियो ।