धरानः अन्तर विद्यालय थ्री वाइ थ्री सियोन बास्केटबल प्रतियोगिताको छात्रछात्रा दुवैतर्फको उपाधि होलिल्याण्ड स्कुलले चुमेको छ ।
सियोन स्कुलको आयोजनामा मङ्गलबार सम्पन्न एकदिने प्रतियोगितामा होलिल्याण्ड स्कुलले छात्रतर्फ युएनलाई १०–४ र छात्रातर्फ आयोजक सियोन स्कुललाई ११–० अङ्कको अन्तरले पराजित गर्दै उपाधि जितेका हुन् । बिजेता तथा उपबिजेताले ट्रफी, कफी पव एण्ड रेष्टोको पाँच सय रुपैयाँ बराबरको फुड भौचर, मेडल र प्रमाणपत्र प्राप्त गरेका छन् ।
त्यस्तै, प्रतियोगिताको उत्कृष्ट खेलाडी छात्र र छात्रातर्फ नै होलिल्याण्ड स्कुलका युडी लिम्बू र इच्छा लावती घोषित भइन् । यसैगरी उदयीमान खेलाडी आयोजक सियोन स्कुलका गौरव गुरुङ र इनु लिम्बू घोषित भइन् । उनीनहरुले ट्रफी र प्रमाणपत्र प्राप्त गरेका छन् । पुरस्कृत खेलाडीहरुलाई सियोन स्कुलका डाइरेक्टर खड्गबहादुर थापा मगर, प्राचार्य सञ्जीव बान्तावा, प्रदेश १ बास्केटवल प्रशिक्षक विकास चाम्लिङ राई, महिला बास्केटवलका राष्ट्रिय खेलाडी डा. आशा राईलगायतले पुरस्कार वितरण गरेका थिए ।
सोही दिन प्रतियोगिताको फाइनल खेलअघि थ्री पोइन्ट कम्पिटिसन समेत आयोजना गरिएको थियो । थ्री पोइन्ट कम्पिटिसनमा ५ बास्केट गर्दै डिपो स्कुलका रिदम लिम्बूले उपाधि जितेका थिए । उनले ट्रफी, पाँच सय रुपैयाँ बराबरको कफी पब एन्ड रेष्टोको फुड भौचर र प्रमाणपत्र प्राप्त गरेका छन् ।
प्रतियोगितामा धरान र तरहराका गरी छात्रतर्फ ९ र छात्रातर्फ सात टिमले सहभागिता जनाएका थिए । सहभागी विद्यालयहरुमा आयोजक सियोन स्कुल, होलिल्याण्ड स्कुल, युएन, डिपो, समिट स्कुल, हिमशिखर तरहरा र केके इन्टरनेसशल स्कुल रहेको थियो ।
बिहानदेखि साँझसम्म सम्पन्न एकदिने प्रतियोगिताको प्रमुख अतिथि धरान उपमहानगरपालिका प्रमुख तिलक राई रहेका थिए । धरान बास्केटबल संघको प्राविधिक सहयोग सम्पन्न प्रतियोगितामा नेपाल पत्रकार महासंघ सुनसरी अध्यक्ष जनकऋषि राई, प्रेस सेन्टर नेपालका प्रदेश १ सदस्य सञ्जय याक्खालगायतको उपस्थिति रहेको थियो । प्रतियोगिताका सम्पूर्ण खेल धरान–१६ स्थित सियोन स्कुलको बास्केटबल कोर्टमा सम्पन्न भएको थियो ।
तस्वीरहरुः विकास चाम्लिङ राई