धरानः धरानमा चलचित्र ‘गाउँ आएको बाटो’ नामक चलचित्रको छायाङ्कन भएको छ ।
तीनदिनसम्म लगाएर चलचित्रको टोलीले धरानमा छायाङ्कन गरेको हो । नविन सुब्बाको निर्देशन तथा नायक दयाहाङ राई र नायिका पशुपति राईको मुख्य भूमिकामा बन्न लागेको चलचित्रको छायाङ्कन धरानमा भएको हो ।
आइतबारदेखि धरानमा छायाङ्कन गरेको टिमले धरानमा बुधबारसम्म छायाङ्कन गरी बिहीबार बिहान भोजपुर वालङ्खा फर्किएका छन । युनिटले बुधबारसम्म धरानका भानुचौक, मुनाल चौक, राँगाचौक, सब्जी मण्डीलगायत विभिन्न स्थानमा छायाङ्कन गरेका थिए ।
उनीहरुलाई मङ्गलबार साँझ भने खदा ओढाएर धरान–१० स्थित पुतली लाइनमा रहेको कफी पव एण्ड रेष्टोले स्वागत सम्मान गरेको थियो । पबमा फ्यानहरुले दयाहाङ र पशुपतिलाई घेरेपछि एकछिन तस्वीर खिचाउने कार्य भएको थियो ।
आमोदको निर्माणमा बन्न लागेको चलचित्रमा दयाहाङ र पशुपतिसँगै प्रमिसा राई, केशव राई, राज थापा, प्रेम सुब्बा, बालकलाकार प्रशन राई र खानुवुङ राईको भूमिका रहेको छ । भर्खरै मात्र कवड्डी ४ को छायाङ्कन सकेको दयाहाङको योसँगै चार वटा चलचित्र प्रदर्शनीको लाइनमा रहेको छ । यसअघि कवड्डी ४ सँगै निरफुर र जारीको छायाङ्कन सकिएको छ ।
छायाङ्कनको अन्तिम चरणमा पुगिसकेको यस चलचित्रमा गाउँमा बाटो आएपछिको परिवर्तन, उपलव्धी, खुशी देख्न सकिने निर्देशक सुब्बाले बताए । उनले थपे, ‘चलचित्रमा गाउँमा विकास भएपछि बुबा र छोराको सम्बन्ध, मानवीय संवेदनशीलतामा देखिएको परिवर्तन देखाइएको छ ।’
रिलिज मितिको प्रसङ्गमा भने चलचित्रलाई अन्तर्राष्ट्रियकरण गर्ने उद्देश्य भएकोले अन्तर्राष्ट्रिय फिल्म फेस्टिवलमा वल्र्ड प्रिमियरमा प्रदर्शन गर्ने योजना रहेको सुब्बाले जानकारी दिए । रिलिज मिति सोहीअनुसार तोकिने उनले बताए ।