धरानः सुरिलो आवाजका धनी हुन्– विकास तुम्बापो (लिम्बू) । यस्तै सुरिलो स्वरका कारण उनी भ्वाइस अफ नेपाल सिजन २ को अन्तिम प्रतिस्पर्धासम्म पुग्न सफल भए । उनी प्रतिस्पर्धामा पुग्ने ४ मध्ये एक हुन् । झापाको अर्जुनधारा नगरपालिका १ मा जन्मिएका उनी अहिले काठमाडौंमा बस्दै साङ्गीतिक यात्रामा अघि बढिरहेका छन् ।
धरानमा आइपुगेका बेला उनीसँगको कुराकानीमा उनले साङ्गीतिक क्षेत्रबाट आफू ‘एक्साइटेड’ रहेको बताएका छन् । यही क्षेत्रबाटै बढ्दो व्यस्तता, आम्दानी आदि हिसाबले पनि उनको उचाइमात्रै चुलिएको छैन, उनलाई एक्साइटेडसमेत बनाएको छ । सामान्य किसान परिवारमा जन्मिएका उनी २०६६ सालमा एसएलसी र प्लस टु झापाबाटै सकेर विगत ९ वर्षदेखि साङ्गीतिक दुनियाँमा रम्दै आएका छन् ।
०६७ मा ‘स्वर सङ्ग्राम’ नामक कार्यक्रममा भाग लिन काठमाडौं पुगेका उनी त्यो साङ्गीतिक यात्रामा सफलता नमिलेपछि केही वर्ष साङ्गीतिक क्षेत्रबाट हराएका थिए रे । ‘फ्रष्टेसन नै शुरु होला जस्तो भयो, त्यसपछि म विदेश जान भनेर हिँडे तर झापामा आफन्तलाई भेट्न पुग्दा मोटरसाइकल दुर्घटनामा परें’, उनले भने, ‘त्यसपछि मेरो विदेशयात्रामा पूर्णविराम लाग्यो ।’ त्यसपछि उनी फेरि काठमाडौंमै सङ्गीत सिक्छु भन्दै लागे । कपडा पसलमा काम गर्दागर्दै उनले विज्ञापन एजेन्सीमा पनि कामको अनुभव लिए । एजेन्सीमै काम गर्दैगर्दा दरबारमार्गस्थित मधुशाला गीत, गजल रेष्टुरेण्ट एण्ड बारमा सञ्जय तमु्रकसँग भेट हुन थाल्यो । उनको त्यो रेष्टुरेण्टमा उदय–मनिता सोताङ गुञ्जिरहन्थे ।

उनै तम्रुकसँग चिनजानपछि उनले त्यहाँ काम गर्न थाले गजल गायन गर्दागर्दै रियालिटी शोहरु सिङ्गीङ आइकल, खोजी प्रतिभा सिजन २, स्वर सङ्ग्राममा भाग लिए । नेपाल आइडलमा पनि प्रयास गरे, त्यसमा पनि उनी छानिएनन् । तैपनि हिम्मत नहारी अघि बढेका उनले भ्वाइस अफ नेपालमा ग ए । त्यसबाट अघि बढ्न नसकेपछि गजल गायनको प्रभावले दोस्रो म्वाइस अफ नेपालमा सजिलै छानिए । उनी हजारौंलाई पछि पार्दै टप ४ सम्म पुग्न सफल भए । अहिले उनले धेरैवटा गीतमा स्वर भरिसकेका छन् । उनी अहिले जताततैबाट गाउनका लागि ‘डिमाण्ड’ आउने गरेको बताउँछन् । अहिले उनी यही साङगीतिक क्षेत्रमै व्यस्त छन् र यसैमा रमाएका छन् ।
धरान आएको बेला उनीसँग हाम्रो कोशी आवाजले गरेको छोटो कुराकानीमा उनले भने, ‘जे होस् पहिला गरेको परिश्रमको फल अहिले पाइरहेको छु जस्तो लाग्छ । अहिले जताततैबाट साङ्गीतिक कर्मका लागि ‘अफर’ आउने गरेको छ ।’
भनेपछि साङ्गीतिक क्षेत्रमा पनि आम्दानी छ भन्ने प्रश्नमा उनले थपे, ‘छ । म साङ्गीतिक यात्रामा लाग्दा केही नभएको हो कि भन्ने भान भएर फ्रष्टेसनजस्तो भएको थिएँ तर अहिले लागेको छ कि यसैमा केही छ । यसैलाई आत्मसात गरेर पछिका दिनमा केही गर्छु भन्ने आँट पलाएको छ । साङ्गीतिक क्षेत्रबाट अहिले मेरो जीवन निर्वाहदेखि अन्य कुराहरु पनि सहज भइरहेको छ । दर्शकहरुको माया र साथ, सहयोग पाइरहेको छु ।’
उनले भ्वाइस भिड्नुअघि तीनवटा र भिडिसकेपछि ५० वटाभन्दा बढी गीत गाइसकेका छन् । यो क्षेत्रमा लाग्न राजेशपायल राई, शम्भु राई, जगदीश समाल, नारायण गोपाल, भक्तराज आचार्य आदिको गीत सुन्दासुन्दै उहाँहरुकै प्रेरणाले अघि बढेको उनी बताउँछन् ।
हेरौं, सुनौं भिडियो कुराकानीः