धरानः धरान मेघा–हिमालयन कलेजको आयोजना तथा धरान बास्केटबल संघको संयोजनमा सम्पन्न हुन लागिरहेको कार्यक्रममा सहभागी हुन प्रदेश १ का मुख्यमन्त्री राजेन्द्रकुमार राई आउने भएका छन् ।
शनिबार दिउँसो १२ः३० बजेदेखि शुरु हुने फाइनल खेलको समापन समारोहमा उनी प्रमुख अतिथिको रुपमा सहभागिता जनाउने कलेजका प्रिन्सिपल भाष्कर पौडेलले जानकारी दिए ।
यसैबीच धरान मेघा–हिमालयन कलेजको आयोजना तथा धरान बास्केटवल संघको संयोजनमा सम्पन्न धरान मेघा रेवाहाङ मेमोरियल अन्तर विद्यालय बास्केटबल प्रतियोगिताको फाइनलमा आयोजक धरान मेघा र एम्स एकेडेमी भिड्ने भएका छन् ।
आयोजक धरान मेघाले डिपो स्कुललाई ५२–३४ अंकको फराकिलो अन्तरले पराजित गर्दै फाइनल यात्रा तय गरेको हो । धरान मेघाको तर्फबाट योगेश राईले उत्कृष्ट प्रदर्शन गर्दै धरान मेघालाई फाइनल यात्रा गराएका छन् । उनले ६ वटा थ्री पोइन्टसहित व्यक्तिगत २७ अंक जोडेका थिए । खेलको पहिलो क्वाटरमा ९–१३ अंकको अन्तरले पछि परेको धरान मेघाले दोस्रो क्वाटरमा ११–२, तेस्रो क्वाटरमा २२–९ र चौथो क्वाटरमा १०–१० बराबर अंक जोडेका थिए । हारसँगै डिपो स्कुल सेमिफाइनलसम्मको यात्रापछि प्रतियोगिताबाट बाहिरिएको छ ।
यसैगरी सोहीदिन भएको दोस्रो सेमिफाइनल खेलमा एम्स एकेडेमीले सियोन स्कुललाई ५१–४७ अंकको झिनो अन्तरले पराजित गर्दै फाइनलमा प्रवेश गरेको छ । सियोनका साहिल तामाङले उत्कृष्ट प्रदर्शन गरेपनि टिमलाई जीत दिलाउन भने सकेनन । उनले सियोनका लागि व्यक्तिगत २४ अंक जोडेका थिए ।
अत्यन्त प्रतिस्पर्धामक भएको खेलमा पहिलो क्वाटरमा एम्स १४–१० अंकले अगाडि रहेको थियो । दोस्रो क्वाटरमा सियोन स्कुल खेलमा फर्किदै १५–१० अंक जोड्दै दोस्रो क्वाटरमा अग्रता बनाएको थियो । तेस्रो क्वाटरमा एम्सले १९–६ अंकको फराकिलो अन्तर बनाउँदै तेस्रो क्वाटर सकिन्दा एम्सले खेलमा अग्रता लिएको थियो । चौथो क्वाटरमा सियोनले १६–८ अंकको अग्रता बनाएपनि ४ अंकको अन्तरले पराजित हुँदै सियोन प्रतियोगिताबाट बाहिरिएको थियो । एम्सका तर्फबाट सितम लिम्बूले व्यक्तिगत १८ अंक जोडेका थिए ।
दिवंगत उदयमान बास्केटवल खेलाडी रेवाहाङ राईको स्मृतिमा मंगलबारदेखि प्रतियोगिता सम्पन्न भएको हो । चैत्र १५ गतेदेखि सुरु भएका प्रतियोगिताका बिजेताले नगद पन्ध हजार, ट्रफी, मेडल र प्रमाणपत्र प्राप्त गर्नेछ भने उपविजेताले नगद सात हजार ५ सय, ट्रफी, मेडल र प्रमाणपत्र प्राप्त गर्नेछन् । यसैगरी प्रतियोगिताको व्यक्तिगत विधातर्फ उत्कृष्ट खेलाडीले नगद एक हजार ५ सय, उत्कृष्ट स्कोरले नगद १ हजार, कफी पव एण्ड रेष्टोको फुड भौचर, ट्रफी र प्रमाणपत्र प्राप्त गर्नेछ । कफी पव थ्री पोइन्ट च्याम्पियनले नगद दुई हजार, ट्रफी र उदयीमान खेलाडीले ट्रफ्री, कफी पव फुड भौचर र प्रमाणपत्र प्राप्त गर्नेछन् । प्रतियोगिताको फाइनल खेलअघि कफी पव थ्री पोइन्ट कम्पिटिसन हुनेछ ।