धरानः धरान–८ को भोटेपुलनजिकै दुर्घटना हुँदा एकजना गम्भीर घाइते भएका छन् ।
बसको ठक्करले मोटरसाइकल चालक धरान–११ का २५ वर्षीय मोहन राई गम्भीर घाइते बनेको जिल्ला ट्राफिक प्रहरी कार्यालय धरान सुनसरीका प्रमुख भुवनबाबु खड्काले जानकारी दिए । भानुचोकबाट इटहरीतर्फ हिँडेको को१ख ७८४८ नम्बरको पैरवी नामको यात्रुबाहक बसले बा७२प ९८६ नम्बरको मोटरसाइकललाई ठक्कर दिँदा उनी घाइते बनेका हुन् । उनी धनकुटे रोडबाट मुख्य रोड हुँदै भानुचोकतर्फ आउँदै थिए । तीब्र गतिमा हुइँकिएको स्कुटीलाई बसले ठक्कर दिँदा उनी उछिटिन पुगेका थिए ।

घाइते राईको अहिले धरानस्थित बीपी प्रतिष्ठानमा उपचार भइरहेको छ । उनको अवस्था गम्भीर रहेको चिकित्सकले बताएका छन् । ‘उनको अहिले प्रतिष्ठानमै उपचार भइरहेको छ’, प्रमुख खड्काले भने, ‘उनी बोल्न सक्छन् तर पनि टाउकोमा गहिरो चोट लागेको छ ।’
बस चालक भने फरार रहेको र खोजी भइरहेको प्रहरीले जनाएको छ ।