धरानः धरानस्थित बीपी कोइराला स्वास्थ्य विज्ञान प्रतिष्ठान सुधारका लागि पाँच सदस्यीय कार्यदल बनेको छ ।
धरान उपमहानगरपालिकाबाट एकजना, आन्दोलनरत पक्षबाट दुईजना र प्रतिष्ठानका तर्फबाट दुईजना गरेर पाँच सदस्यीय कार्यदल बनेको हो । सोमबार राति अबेरसम्म जारी वार्ताले सो निष्कर्ष निकालेको हो ।
घोपा बचाऊ अभियानका संयोजक सुदन गुरुङले आन्दोलनरत पक्ष, बीपी प्रतिष्ठानका उपकुलपति डा. ज्ञानेन्द्र गिरी, धरान उपमहानगरपालिकाका मेयर हर्क साम्पाङलगायतबीच सोमबार वार्ता भएको र वार्तामार्फत् पाँच सदस्यीय कार्यदल बनेको जानकारी दिए ।
घोपा बचाऊ अभियानले उठाएका मागहरुलाई सम्बोधन गर्ने र सम्बोधन भएनभएको अनुगमन हुने साथै अन्य के के कमजोरी छन् र सुधार गर्न सकिन्छ भनेर सुझाव पेश गर्ने सहमति बनेको
धरान उपमहानगरपालिकाका र आन्दोलनरत पक्षले सम्पूर्ण के के सुधार ल्याउने, के के कमी कमजोरी छन् सिफारिस गरेपछि सुधारको पक्षमा जाने समेत सहमति बनेको अभियानकर्मी नविन राईले जानकारी दिए । अभियानकर्मीले उठाएका साना साना माग १५ दिनभित्र पूरा गर्ने सहमति बनेको पनि उनले जानकारी दिए ।
उनका अनुसार शान्तिपूर्ण आन्दोलन १५ दिनसम्म चलिरहनेछ । ‘१५ दिनसम्म हाम्रो आन्दोलन चलिरहन्छ’, उनले भने, ‘१५ दिनभित्रमा सुधार भयो, भएन अनुगमन हुन्छ, सुधार भएन भने वृहत आन्दोलन शुरु हुन्छ ।’ उनले भने ।
उपकुलपति डा. गिरीले भने मागहरु सम्बोधन गर्दै अघि बढ्ने र प्रतिष्ठानलाई सुधार्न लागिपर्ने प्रतिबद्धता जनाएका छन् । कार्यक्रममा उनले प्रतिष्ठानमा राजनीतिक खेल बढी हुने भएकोले यसतर्फ सबै सचेत हुनुपर्ने पनि धारणा राखेका थिए ।