धरानः धरानमा १७ औं जातीय विभेद तथा छुवाछुत उन्मुलन दिवस मनाइएको छ ।
‘सम्पूर्ण उत्पीडित दलित शिल्पी एक होऔं’ भन्ने नाराकासाथ यस्तो दिवस मनाइएको हो । भानुचोकस्थित लोकतान्त्रिक चौतारीमा एक कार्यक्रमका बीच भएको कार्यक्रम नेपाल दलित संघ,नेपाल दलित मुक्ति मोर्चा र समाजवादी दलित शिल्पी महासंघले संयुक्तरुपमा आयोजना गरेका हुन् ।
कार्यक्रममा बोल्दै धरान उपमहानगरपालिकाका उपमेयर अइन्द्रविक्रम बेघाले संविधानमा नै मौलिक हकमा छुवाछुत, विभेदको अन्त्य भएको लेख्न सफल भएको बताए । उनले आगामी दिन दलित समुदायलगायतको संस्कार, संस्कृतिसँग जोडिने आश्वासन दिए । उनले आगामी दिनमा विगतका कमजोरीलाई सच्याउँदै नयाँ ढङ्गले जाने बताए ।
जनता समाजवादी पार्टीको नगर अध्यक्ष ताजुप लिम्बूले नेपाल संघीय लोकतान्त्रिक गणतन्त्रसम्म आइपुग्दा दलितको ठूलो हात रहेको बताए । जसमा सेतु विक पनि एक भएको बताए । तर उनको सालिक भत्काएको भन्दै साम्प्रदायिक दंगा निम्त्याउन कुचेष्टा गरेको उनले आरोप लगाए ।
नेकपा एमाले धरान नगर उपाध्यक्ष पारस काङमाङले संघीय लोकतान्त्रिक गणतन्त्र आइसक्दा पनि दलितमा छुवाछुत र विभेद रहेको बताए ।
संघीय दलित मुक्ति मोर्चाका अध्यक्ष रमेश गजमेरले राज्यलाई गाली गर्दा आफू थाकेको बताए । ‘दलित मुक्तिको लागि कहिलेसम्म एक होऔं भनिरहने ?’ उनले भने ।
नेपाल दलित मुक्ति मोर्चाका केन्द्रीय सदस्य दिलबहादुर रामदामले राजाकै पालामा छुवाछुतमुक्त भनेर ऐन लेखिएपनि त्यो व्यवहारमा लागू नभएको बताए । विभिन्न कालखण्डमा ऐन नियम लेखिएपनि कार्यान्वयन भएन भने त्यसको अर्थ नहुने उनले दावी गरे ।
कार्यक्रम नेपाल दलित संघ प्रदेश १ सदस्य विजय अछामिको अध्यक्षतामा सम्पन्न भएको हो । कार्यक्रममा बोल्ने अधिकांशले आगामी कार्यक्रम स्थानीय सरकार धरान उपमहानगरपालिकाले आयोजना गर्नुपर्ने धारणा राखेका थिए ।