धरानः फेशन नगरीको रुपमा चिनिने धरानका युवतीहरुको प्रतिभा प्रष्फुटनको लागि फेशन हब नेपाल तथा ब्ल्याक पिग इन्टरटेनमेन्टको आयोजनामा सौन्दर्य प्रतियोगिता ‘मिस धरान २०२२’ आयोजना हुने भएको छ ।
कम्तीमा एसइई उत्तीर्ण तथा १२ कक्षा पढ्दै गरेका धरानका युवतीहरुलाई सहभागी गराइने कार्यक्रम यो वर्षदेखि धरानमा आयोजना हुने भएको छ । आयोजक संस्थाका निर्देशक हरिहाङ तिगेलाका अनुसार मिस धरान २०२२ को आवेदन खुल्ला गरिएको छ र अनलाइनसँगै एसएमएसबाट समेत आवेदन दिन सकिनेछ भने आवेदन निःशुल्क गरिएको छ ।
मिस धरानको अफिसियल फेसबुक पेज रहेको अनलाइन फर्म मोबाइलको म्यासेज बक्समा गई सहभागीको नाम, उचाई, उमेर, ठेगाना र शिक्षा टाइप गरी ३३००१ मा पठाउनु पर्नेछ । अनलाइन तथा एसएमएसबाट आएका आवेदनहरूका आधारमा असार दोस्रो साता मिस धरान २०२२ को अडिसन शुरु हुने उनले जानकारी दिए । मिस धरान २०२२ को कोरियोग्राफी मिस तामाङ २०१९ प्रदेश १ बिजेता तथा मिस टुरिज्म क्विन वल्र्डवाइड २०१९ मा बेस्ट इस्माइलको टाइटल बिजेता प्रोजिता लामाले गर्नेछिन् ।
अडिसनबाट छानिएका प्रतियोगीहरुलाई २० दिन व्यक्तित्व विकास, फेशन, र्याम्प वर्क, सौन्दर्य, पर्यटन, इतिहास, क्याटवर्कलगायतका अन्य विभिन्न विषयहरुमा सम्बन्धित क्षेत्रका विज्ञहरुबाट प्रशिक्षण दिइनेछ । मिस धरान २०२२ बिजेता, फस्ट रनरअप, सेकेन्ड रनरअपसँगै मिस ट्यालेन्ट, मिस फोटोजेनिक, मिस चार्मिङ, मिस व्युटीफुल स्माइल र मिस पर्सनालिटी, मिस व्युटीफुल कम्लेक्सन लगायतका विभिन्न सब–टाइटलको उपाधिसँगै बिजेताहरुलाई आकर्षक पुरस्कारको समेत व्यवस्था गरिएको आयोजकले जनाएको छ ।