धरानः धरान–१६ स्थित युएन नवोदय कलेजले प्रदेश नम्बर १ मै पहिलोपटक धरानमा प्रदेशस्तरीय युएन सेफ प्रतियोगिता गर्ने भएको छ ।
बुधबार कलेजमा पत्रकार सम्मेलनको आयोजना गरी प्रतियोगिताबारे जानकारी गराइएको हो । पत्रकार सम्मेलनमा वितरित विज्ञप्तिअनुसार आगामी असार–६ गते कलेजमा सेफ प्रतियोगिता हुने भएको छ ।
प्रतियोगितामा होटल म्यानेजमेन्ट विषय लिई कक्षा–१२ को परीक्षा सकेर बसेका विद्यार्थीहरुले भाग लिन पाउने कलेजका होटल म्यानेजमेन्ट कोअर्डिनेटर गगन श्रेष्ठले जानकारी दिए । श्रेष्ठका अनुसार हरेक कलेजबाट दुई समूह विद्यार्थीले भाग लिन पाउनेछन् भने एउटा समूहमा दुईजना विद्यार्थी रहनेछन् ।
प्रतियोगिताको बिजेताले बिएचएम अध्ययनका लागि छात्रवृत्ति पाउनुका साथै नगद १ लाख रुपैयाँ, ट्रफी र प्रमाणपत्र पाउनेछ । बिएचएम पढ्नका लागि ६ लाख बढी रकम खर्चिनुपर्ने हुन्छ । फष्ट रनरअपले छात्रवृत्तिसहित ५० हजार रुपैयाँ नगद, ट्रफी र प्रमाणपत्र पाउनेछ ।
त्यस्तै, सेकेण्ड रनर अपले छात्रवृत्तिसहित ३० हजार रुपैयाँ नगद, ट्रफी र प्रमाण–पत्र पाउने छ । प्रदेश नम्बर १ मा हस्पिटालिटी इन्डष्ट्रिज र पर्यटनको प्रवद्र्धन गर्ने उद्देश्यले यस वर्षदेखि युएन सेफ प्रतियोगिता आयोजना गर्न लागिएको कलेजका क्याम्पस प्रमुख डम्बरकुमार तुम्बापोले जानकारी दिए ।
होटल म्यानेजमेन्ट अध्ययन गरेका विद्यार्थीहरुले प्लस टु लेभलमा पढेका, सिकेका र जानेका सीपलाई प्रदर्शन गर्नका लागि एउटा राम्रो प्लेट फर्म मिलोस् भन्ने उद्देश्यले पनि सेफ प्रतियोगिता गर्न लागिएको कलेजका अध्यक्ष ज्ञानेश्वर झाले जानकारी दिए ।