धरानः सुनसरी जिल्ला ब्याडमिन्टन संघले धरान उपमहानगरपालिकाको प्रायोजनमा सुनसरी जिल्लास्तरीय खुल्ला मेयरकप ब्याडमिन्टन प्रतियोगिता शुरु गरेको छ ।
शनिबारदेखि अमर सेवा समाज धरान-१३ .को व्याडमिन्टन कवर्डहलमा प्रतियोगिता शुरु भएको हो । संघका अध्यक्ष प्रतिक श्रेष्ठको अध्यक्षतामा सम्पन्न प्रतियोगितामा धरान उपमहानगरपालिकाका मेयर हर्कराज राई (साङपाङ) को प्रमुख आतिथ्यमा प्रतियोगिताको उदघाटन भएको छ ।
व्याडमिन्टन संघका केन्द्रीय उपाध्यक्ष चन्द्रशेखर लामा र धरान-१३ का वडाअध्यक्ष नेत्र काफ्ले विशेष अतिथि रहेका थिए । कार्यक्रममा नगर प्रमुख हर्क साम्पाङले खेलकुदले खेलाडीहरुलाई स्वस्थ र अनुशासित बनाउनका साथै देशको गरिमा बढाउने भएकोले खेलकुदका गतिविधिहरु अनिवार्य गर्नुपर्ने बताए । उनले खेलको विकासको लागि आगामी दिनहरुमा आवश्यक सहयोग गर्ने प्रतिबद्धता व्यक्त गरेका थिए ।
प्रतियोगितामा चारवटा इभेन्टहरु खेलाइने अध्यक्ष प्रतिक श्रेष्ठले बताए । यसअन्तर्गत मेन्स डवल्सतर्फ रविन साउदेन र सत्यम लिम्बूको जोडी तथा सुरेश नेयोङ र रविन आन्खेवा लिम्बू छन् । भेट्रान्स डबल्सतर्फ गणेश राई र सुरत इवाहाङ तथा श्याम लामा र सुदीप सुवेदीको जोडी रहेको छ ।
यसैगरी अन्डर १७ ब्वाइज सिङलतर्फ रोधन राई र योदेश राई तथा महिला डबल्सतर्फ इन्दिरा राई , याङ्ला शेर्पाको जोडी तथा लक्ष्मी तामाङ र सृष्टि राईको जोडी फाइनलमा भिड्ने छन् । बिजेता टिमलाई नगद, ट्रफी, प्रमाणपत्रले पुरस्कृत गरिने कार्यक्रमका संयोजक राजकुमार कर्मचार्यले बताए ।