धरानः धरानमा हत्या गरी फरार रहेका एक व्यक्ति ९ वर्षपछि पक्राउ परेका छन् ।
पक्राउ पर्नेमा उदयपुर त्रियुगाका गम्भीरबहादुर दनुवार रहेका छन् । १९ वर्षीय किशोर चित्रकुमार मग्रातीको हत्या गरेर उनी फरार रहँदै आएका थिए । उनले हत्या गरेको प्रमाणित गर्दै सुनसरी अदालतले उनीमाथि २० वर्ष कैद फैसला सुनाएको थियो । त्यसपछि उनी हालसम्म पनि फरार रहँदै आएका थिए ।
उनलाई जिल्ला प्रहरी कार्यालय सुनसरीको टोलीले गत १० गते लगातार दुई महिनाको नियमित फलोअप पश्चात बानियाटार काठमाण्डौबाट पक्राउ गरिएको जिल्ला प्रहरी कार्यालय सुनसरीका एसपी सञ्जयसिंह थापाले जानकारी दिए । उनलाई कैद भुक्तानका लागि झुम्का कारगार चलान गरिएको उनले जानकारी दिए ।
यस्तो थियो घटना
करिब ९ वर्षअघि धरान–२० मा पिकनिकमा विवाद बढ्दै जाँदा कुटपिट हुँदा एकजनाको मृत्यु भएको थियो । २०७१ साल मङसिर १ गते भोजपुर हसनपुरका १९ वर्षीय किशोर चित्रकुमार, उदयपुर त्रियुगाका गम्भीरबहादुर र संखुवासभा फाकुका विक्रम राई धरानमा पिकनिक खान आएका थिए ।
उनीहरुबीच विवाद बढ्दै जाँदा गम्भीरबहादुर र विक्रम मिलेर चित्रकुमारमाथि कुटपिट गरेका थिए । कुटपिटबाट चित्रकुमारको मृत्यु भएपछि जंगलमा लगेर स्याउला र झारपातले पुरी उनीहरु फरार भएको पाइएको जिल्ला प्रहरी कार्यालय सुनसरीका एसपी थापाले जानकारी दिए ।
फरारमध्येका विक्रमलाई २०७१ मङसिर १४ गते नै भोजपुरको दिङ्लाबाट पक्राउ गरी अनुसन्धानपश्चात् सुनसरी जिल्ला अदालतमा पेश गरिएको र पुस ८ गते पुर्पक्षका लागि कारागार चलान गरिएको प्रहरीले जनाएको छ ।
‘ ९ वर्षपछि पनि अपराधी समात्न सफल भइयो’, उनले भने , यस अभियानका माध्यमबाट ‘अपराध गरेर जतिदिन लुकिछिपी बसेपनि तोकिएको कैद वा जरिवाना भुक्तान नगरी छुट छैन वा अपराध गरेपछि सजाय भुक्तान नगरी बचेर बस्न सकिँदैन भनेर समाजमा सन्देश दिन र यही सन्देशका माध्यमबाट समाजमा अपराधको न्यूनीकरण पनि गर्नका लागि केही मात्रामा भनेपनि सचेतना फैलिने आशा गरिएको छ ।’ एसपी थापाले भने ।