धरानः धरान उपमहानगरपालिकाका मेयर हर्कराज साम्पाङ राईले आफू प्रत्येक शनिबार पनि जनताकै काममा खटिरहने उद्घोष गरेका थिए । उनी त्यही प्रतिबद्धता अनुसार खटिपनि रहेका छन् । पकुवा खोलाबाट पानी ल्याउन उनी जनतासँगै श्रमदान गरिरहेका हुन्छन् । अहिले पानी ल्याउने काम अन्तिम चरणमा छ । अहिले सामाजिक सञ्जाल, मिडिया जताततै पकुवा खोलाकै चर्चा छ ।
दुई हप्तापनि पकुवा खोलामै बिताएका उनले यो शनिबार पनि पकुवा खोलाबाट पानी ल्याउनै लागिपरिरहे । उनले शनिबार सयौं जनताको उपस्थितिमा पाइप तान्न सघाए । भीर–पहरा नभनी उनी जनतासँगै खटिरहे । पाइप तानेर फर्किँदा मेयर साम्पाङ भीरबाट चिप्लिएपनि । भीर–पहरा नभनी धराने जनता, युवापुस्ताले बढीजसो साथ दिइरहेको पाइन्छ (हे. भिडियो) ।
भीरमा चढ्न सक्ने मात्रै जानुपर्छ है भन्दै उनी पाइप तान्न एउटा पहरामा पुगे । त्यहाँबाट फर्किने क्रममा उनी चिप्लिएका हुन् । लडौंला जस्तो भएर चिप्लिएपछि उनले रुखको बुटो समातेका थिए । (हे.भिडियो)
अहिले पकुवा खोलामा पानी ट्याङकी निर्माणपछि पाइप बिछ्याउने काम अन्तिम चरणमा छ । धरान–११ को ट्याङकीमा पानी खसाउन अब केहीदिन मात्रै लाग्नेछ । सर्दुखोलामा पाइप तार्नका लागि त्यहाँ समेत काम भइरहेको छ । राम्रो कामका लागि जनताले समेत साथ दिने सन्देश मेयर साम्पाङ र धराने जनताले छरेको धरान–१७ का नारायण प्रधानले बताए ।
मेयर साम्पाङले मलाई कुल्ली भन्दा मन दुखाउ नभएको बताएका छन् । ‘मलाई त कुल्ली भन्छन् होइन, मजदुर भन्छन्, किसान भन्छन्, वास्तवमा म कुल्ली मजदुर र किसान नै हुँ’, उनले भने, ‘तर मलाई मन दुखाउ पनि छैन, म यसैमा रमाउँछु ।’
हेटौडाबाट पनि युवा आइपुगे
हेटौंडाबाट समेत केही युवा मेयर साम्पाङको काम हेर्नकै लागि भएपनि आइपुगेका छन् । ‘विशेषतः यहाँको विकास र जनश्रमदान नियाल्न नै यहाँ आइपुगेका हौं’, सुवास लामाले भने, ‘जे होस् यहाँका जनता र मेयर साम्पाङको कार्यशैली मन परयो, वास्तवमा मेयर साम्पाङबारे सुनेको मात्रै होइन वास्तवमै उहाँ त भुइँमान्छे नै हुनुहुँदोरहेछ ।’
शुक्रबार त्यहाँबाट हिँडेको बताउने उनीहरुले शनिबार विदा परेको र आइतबार समेत सार्वजनिक विदा परेकोले यहाँ हेर्नकै लागि आइपुगेको उनले बताए । जसरी पनि भेट्नैपर्छ भन्ने हिसाबले आफूहरु यहाँ आइपुगेको अर्का युवा देवेन्द्र कुँडालले बताए । आफूहरुले स्कुल चलाउने गरेको र त्यहाँ पुगेपछि विद्यार्थीलाई पनि केही उत्प्रेरणा प्रदान गर्ने अवसर जुरेको र त्यही खालको कार्यक्रम लिएर फर्किन पाएको उनले बताए । तस्वीरहरुः हाम्रो कोशी आवाज