धरानः धरानका मेयर हर्कराज राई (साम्पाङ)ले धराने जनतालाई जसरी पनि पानी खुवाउने प्रतिबद्धता व्यक्त गरेका छन् ।
शनिबार पकुवा खोलाबाट पानी ल्याउन पाइप तान्दै जनश्रमदान गरिसकेपछि पत्रकारहरुसँगको कुराकानीमा उनले सो कुरा बताएका हुन् । उनले आफूलाई जतिसुकै मुद्दा लागेपछि जसरी पनि पानी खुवाएरै छाड्ने बताए । उनले धराने जनतालाई पानी खुवाउनका लागि मरिहत्ते गरिरहेको समेत बताए । ‘धराने जनतालाई पानी खुवाउनका लागि त मैले भनेको छु, मलाई २० वटा मुद्दा लागोस्, धाउँछु म, २० वटा मुद्दा है, हेडलाइन बनाउने हो कि (हाँसो) ।’
उनले सर्दु, खदुलगायतका मुहानबाट थप पानी संकलन गर्दै लैजाने पनि बताए । उनले बीपी पार्कदेखि माथि ठूलो पोखरी बनाउने र जनतालाई पानी खुवाएरै छाड्ने उनले प्रतिबद्धता जनाए । ‘तपाईहरुलाई भनौं बीपी पार्कदेखि माथि एउटा ठूलो पोखरी बनाउँछौं’, उनले थपे, ‘मङसिर महिनाको पानी त्यहाँ स्टोर गर्छौं अनि फागुनदेखि त्यो पानी चलाउँछौं ।’