धरानः धरान उपमहानगरपालिकाका उपप्रमुख अइन्द्रविक्रम बेघाले असक्त र बालबालिकाहरुलाई खाना खुवाएर सोमबार जन्मदिन मनाएका छन् ।
धरान छाताचोकस्थित पुनःस्थापना केन्द्रमा रहेका २६ जना असक्त र बालबालिकाहरुसँगै खाना खाएर उपप्रमुख बेघाले आफ्नो जन्मदिन मनाएका हुन् । जन्म दिनमा गरिने फजुल खर्चलाई कटौती गरेर यसरी असहायहरुलाई खाना खुवाएर जन्मदिन मनाउनु रचनात्मक र सह्रानीय कार्य भएको केन्द्रका सञ्चालक भीम राईले जानकारी दिए । राईले उप–प्रमुख बेघालाई जन्मदिनको शुभ–कामना समेत ब्यक्त गरे ।
त्यस्तै, धरान–३ स्थित सरस्वती बाल आश्रममा रहेका बालबालिकाहरुलाई समेत जन्मदिनको अवसरमा खाना खुवाइएको थियो । जन्मदिनमा अनावश्यक खर्च गरेर मनाउनुभन्दा अनाथ बालबालिकाहरुसँग मनाउँदा छुट्टै आन्नद आएको उपप्रमुख बेघाले बताए ।
यसअघिका वर्षहरुमा उपप्रमुख नहुँदा पनि बेघाले अनाथ बालबालिकाहरुलाई खाना खुवाएर जन्मदिन मनाउँदै आएका थिए । उपप्रमुख बेघासँगै पत्नी सविना खनाल बेघा पनि अनाथ आश्रम पुगेकी थिइन् । यसअघि पनि वर्षेनी उनले यिनै ठाउँमा आफ्नो जन्मदिन मनाउँदै आएका थिए ।