धरानः सञ्चारकर्म छाडेर राष्ट्रिय स्वतन्त्र पार्टी दर्ता गराएपछि रवि लामिछाने यतिबेला देश दौडाहामा लागेका छन् । झापामा कार्यक्रम सकेर उनी शुक्रबार धरान आएका हुन् ।
धरानको लागि कार्यक्रमको ‘सेडयुल’ नै बनाएर आइपुगेका उनले धरान उपमहानगरपालिका मेयर हर्क साम्पाङसँग भेट समेत गरेका हुन् । लामिछाने साम्पाङलाई शुभकामना दिन उपमहानगरपालिका पुगेको उनको सचिवालयले जनाएको छ ।
‘तपाइँलाई भेटेरै शुभकामना दिन आएको हो । खासमा मलाई श्रमदानमा पनि सहभागी हुने मन थियो । तर सकिएछ । जनताको एकदम अपेक्षा छ तपाईसित, राम्रो गर्नुहोला । सहकार्य जारी रहनेछ,’ भेटका क्रममा लामिछानेले साम्पाङलाई भने ।
उनीहरुबीच उपमहानगर प्रमुखको कार्यालयमा शुक्रबार बिहान भेट भएको हो । साम्पाङ र लामिछानेबीच भेट भएको स्वतन्त्र पार्टीका नेता दीपक बोहराले जानकारी दिए । उनले दुवै नेताको तस्बिर सामाजिक सञ्जालमा राखेका छन् ।
लामिछाने चुनाव चिह्न घण्टी बोकेर अहिले पार्टी निर्माण अभियानमा छन् । झापाको काकडभिट्टापछि अभियान लिएर रवि धरान आइपुगेका हुन् । गएको स्थानीय तहको निर्वाचनमा हर्कले धरान उपमहानगरपालिकामा स्वतन्त्रबाट ठूला दललाई पराजित गर्दै निर्वाचित भएका थिए । लामिछानेले पनि केही समयअघि पार्टी घोषणा गरेका थिए । उनी आउँदो निर्वाचनमा काठमाडौंबाट लड्ने तयारी गरेका छन् ।